Түркия Республикасынын тышкы иштер министри Хакан Фидан Дохага болгон сапарынын алкагында алгач Катар эмири Шейх Тамим бин Хамад Ал-Тани тарабынан кабыл алынды.
Сапардын алкагында Түркияда өткөрүлүшү пландалып жаткан «Жогорку Стратегиялык Комитет» жыйынына даярдыктар каралат.
Сүйлөшүүлөрдө глобалдык энергия жана соода жолдору үчүн чечүүчү мааниге ээ болгон Ормуз кысыгында кемелердин эркин каттамын кайрадан камсыз кылуунун стратегиялык баалуулугу талкууланат. Бул жагдайдын аймактык коопсуздукка жана дүйнөлүк экономикалык туруктуулукка тийгизген таасирине өзгөчө көңүл бурулат.
Аймактык коопсуздук жана коргонуу кызматташтыгына басым жасалат
Сүйлөшүүлөрдө аймактагы окуялар коргонуу жана аскердик кызматташтыктын стратегиялык баалуулугун дагы бир жолу далилдегени баса белгиленет. Перс булуңундагы пикир келишпестиктерди токтотуу артыкчылыктуу маселелердин катарында болору күтүлүүдө. Ошондой эле Түркия менен Катардын бул багыттагы биргелешкен аракеттери аймактык туруктуулук жана экономикалык интеграция үчүн өтө маанилүү экени айтылат.
Газза, Ливан жана «аймактык жоопкерчилик» күн тартиби
Дохадагы сүйлөшүүлөрдүн дагы бир маанилүү күн тартиби — Израилдин аймактагы аракеттери болот. Сапардын алкагында Израилдин тынчтык жараянын татаалдаштырган саясатына каршы «аймактык жоопкерчиликти алуу» өзгөчө белгиленип, Газа жана Батыш Шериадагы гуманитардык абалды эл аралык коомчулуктун күн тартибинде сактап калуунун мааниси баса белгиленет. Мындан тышкары, Ливандын эгемендүүлүгүн коргоо аймактагы туруктуулукту орнотуу үчүн зарыл шарт экени баса белгиленет.
Дүйшөмбү күнү Фидан Катардын вице-премьер-министри жана коргонуу иштерине жооптуу мамлекеттик министри Шейх Сууд бин Абдурахман бин Хасан Ал-Тани менен сүйлөшкөн.
