Иран президенти Масуд Пезешкиан АКШны айыптап, "Иран Ислам Республикасы өз алдынча калыбына келе албай тургандай шарт түзүп жатат" деп билдирди.
Пезешкиан жекшемби күнү Fox News телеканалына берген маегинде Ирандын ядролук куралдарды көздөбөгөнүн айтып, эл аралык санкциялардын жаңыланышына карата жооп берди.
"Биз эч качан тынчтык максатындагы ядролук программадан башка нерсени көздөгөн эмеспиз. Ядролук куралдарга же массалык кыргын салуучу куралдардын эч кандай түрүнө орун жок. Биз эч качан ядролук куралдарды издеген эмеспиз жана издебейбиз",-деди ал.
Израилдин чалгындоо иштерине байланыштуу суроолорго жооп берген Пезешкиан Тель-Авивдин чабуулдары эл аралык мыйзамдарды жана келишимдерди бузганын белгилеп: "Бул Израилдин агрессор экенин көрсөтүп турат," - Израилди күнөөлөдү .
‘Снапбэк’ механизми
Жекшемби күнү Франция, Германия жана Улуу Британия БУУнун Коопсуздук Кеңешинин 2231-резолюциясынын алкагында "снапбэк" механизмин ишке киргизишти. Бул механизм Иран өз милдеттенмелерин аткарбаса, 30 күндүн ичинде санкцияларды кайра калыбына келтирүүнү талап кылат.
Быйыл АКШ жана Израилдин Иранга жасаган чабуулдарынан кийин, Тегеран БУУнун өзөктүк көзөмөл агенттиги менен кызматташууну токтоткон. Иран Эл аралык Атомдук энергия агенттигин (МАГАТЭ) өзүнө карата калыс эмес деп айыптаган.
Быйыл АКШнын аскердик чабуулдары Ирандын өзөктүк объектилерин бутага алган. Трамп администрациясынын өкүлдөрү бул чабуулдар "байытуучу жайларды толугу менен жок кылды" деп билдиришкен, бирок Иран зыяндын көлөмүн талаштуу деп эсептейт.
Санкциялар он жыл ичинде биринчи жолу жекшемби күнү кайрадан киргизилди. Үч өлкө Тегеранды өзөктүк милдеттенмелерин бузду деп айыпташкан. Бул чаралар Тегерандын өзөктүк жана баллистикалык ракета программаларына байланыштуу иш-аракеттерге тыюу салат жана өлкөнүн экономикасына кеңири таасир этери күтүлүүдө.
