Канада коргонуу жагынан АКШдан көз карандылыгын азайтуу үчүн Евробиримдик менен сүйлөшүүлөрдү жүргүзүүдө. Бул алкакта согуштук учактар менен бирге коргонуу шаймандарынын дагы Европадан алынышы пландалууда. Канаданын жогорку даражалуу өкмөт өкүлү бул процесстин бир бөлүгү согуштук учактарды Канадада чыгарууну да камтыганын ырастады.
Бул тууралуу ачык айтууга укугу болбогондуктан аты-жөнүн атабоону суранган аткаминер шаршемби күнү Оттава АКШдан жасалган F-35 согуштук учактарын сатып алууну карап жатканын айтты. Премьер-министр Марк Карни Коргоо министри Билл Блэрге «өзгөрүлүп жаткан шарттарды эске алуу менен» альтернативалык варианттарды карап чыгууну тапшырганы кабарланган.
Карни Канадада көбүрөөк өндүрүштүн маанилүү фактор экенин баса белгилеп, швециялык Saab фирмасынын Грипен согуштук учактарын чогултуу жана тейлөө иштеринин Канадада жүргүзүлүшүн сунуштаганын белгиледи.
Канаданын F-35 согуштук учагы боюнча АКШнын Lockheed Martin коргонуу фирмасы менен келишими дагы деле күчүндө, бирок Оттава азырынча биринчи 16 учакка мыйзамдуу түрдө гана каражат бөлгөн. Канада эки жыл мурун жалпысынан 88 F-35 сатып алууга макул болгон, бирок бул келишимдин аягына чыгабы же жокпу азырынча белгисиз.
АКШга азыраак көз каранды болуу максаты
Шаршембиде Евробиримдиктин аткаруу органы «Даярдык 2030» (Readiness 2030) деп аталган коопсуздук стратегиясын жарыялады. Ал Евробиримдикке мүчө мамлекеттерге аскердик жабдууларды биринчи кезекте Европадан сатып алууну, негизинен европалык камсыздоочулар менен иштешүүнү жана айрым учурларда ЕБ каржылык колдоосу менен буйрутмаларды тездетүүнү сунуштады.
Евробиримдиктин жаңы планына ылайык, жабдууларды чет өлкөдөн сатып алууга гана уруксат берилет, мисалы, нарк, аткаруу же жеткирүү кечигүүсү.
Соңку жылдары Евробиримдиктин 27 мүчөсүнүн коргонуу чыгымдарынын үчтөн экиге жакыны америкалык компанияларга кеткен. Жаңы кредиттик мүмкүнчүлүктөрдөн пайда көрүүнү каалаган ЕБ өлкөлөрү коргонуу сатып алууларынын кеминде 65%ын ЕБ, Норвегия же Украинадагы өндүрүүчүлөрдөн алышы керек.
Швецияда жасалган Saab Gripen согуштук учактары учурда Швеция, Чехия, Венгрия, Түштүк Африка, Бразилия жана Таиланддын аба күчтөрү тарабынан колдонулат.
Өткөн айда Трамптын администрациясы Европа менен Украина өз коргонуусуна кам көрүшү керек деп кыйытты. Франция болсо «Европадан сатып алуу» стратегиясын колдойт.
Шейшембиде Карни Канаданын түндүгүнө барганда Австралиядан 4,2 миллиард долларга радар системасын сатып алгандыгын жарыялады.
Австралиянын радар системасы узундугу 1,6 километрге жакын мачталардын сериясын камтыйт, деди ал. Ал ошондой эле бул сатып алуу Вашингтондо кандай кабыл алынаары тууралуу так комментарий бере албаса да, америкалык аскерий расмий өкүлдөр бул сатып алууну кубаттап жатканын айтты.
