Кремль АКШнын президенти Дональд Трамптын Украинадагы согушка байланыштуу Орусияга карата катуураак позицияны кармануусу АКШ менен Орусиянын мамилелерин калыбына келтирүү боюнча сүйлөшүүлөрдүн аякташын билдирбегенин айтты.
Дүйшөмбү күнү жаңы позициясын жарыялаган Трамп Москвага Украинада ок атышпоо келишимине жетишүү үчүн 50 күндүк мөөнөт берди жана андай болбосо санкцияларга кабыларын эскертти. Трамптын ошондой эле Киевге көбүрөөк ракета берем деген убадасын Орусиянын Тышкы иштер министрлиги бейшемби күнү кескин сынга алды.
Трамптын билдирүүлөрү Москва менен Вашингтондун ортосундагы мамилелерди калыбына келтирүүгө багытталган сүйлөшүүлөрдүн аяктаганын билдиреби деген суроого Кремлдин басма сөз катчысы Дмитрий Песков: “Биз бул андайды билдирбейт деп ойлойбуз. Албетте булар ар башка маселелер. Бир маселе Украинадагы (тынчтыкты) жөнгө салуу маселеси. Экинчи маселе болсо биздин эки тараптуу мамилелерибиз” деп жооп берди.
Москва менен Вашингтондун диалогу Трамп январь айында кызматка киришкенден кийин жакшырган. Бирок Трамп Кремлдин лидери Владимир Путиндин потенциалдуу ок атышпоо үчүн сунуш кылган шарттарынан улам барган сайын нааразы болууда.
Орусия менен Украина быйыл Түркияда эки жолу тынчтык сүйлөшүүлөрүн өткөрүп, туткундарды жана аскерлердин сөөктөрүн алмашуу боюнча макулдашууга жетишкен.
Бирок сүйлөшүүлөрдүн үчүнчү айлампасы өтө турган күн белгилене элек жана согушуп жаткан тараптар кандайдыр бир ок атышпоо же акыркы тынчтык келишиминин шарттарын макулдашуудан азырынча алыс.
