Колумбиянын өкмөтү оппозициялык сенатор жана келерки жылдагы президенттик шайлоого талапкер Мигель Урибе ишемби күнү Боготадагы шайлоо өнөктүгү маалында ок жеп, жарадар болгонун билдирди.
Социалдык тармактарда тараган видеодо 39 жаштагы Мигель Урибенин бир топ адамдардын алдында сүйлөп жаткан учурун жана капысынан октун үнү угулганын көрүүгө болот.
Башка кадрларда Урибенин канга боёлгон ак унаанын капотуна жөлөнүп, бир нече адам аны көтөрүүгө аракет кылганын көрүүгө болот.
Президент Густаво Петронун өкмөтү борбор шаар Боготанын батышында шайлоо өнөктүгү учурунда Урибеге жасалган кол салууну «кескин түрдө» айыптаганын билдирди.
Өкмөттүн билдирүүсүндө: «Бул зордук-зомбулук актысы анын инсандыгына гана кол салуу эмес, ошондой эле Колумбиядагы демократияга, ой эркиндигине жана мыйзамдуу саясат жүргүзүүгө кол салуу болуп саналат», - деп айтылды.
Петрону катуу сындаганы менен белгилүү болгон Урибе 2002-жылдан 2018-жылга чейин башкарган Колумбиянын мурдагы президенти Альваро Урибе жетектеген Демократиялык борбор партиясынын мүчөсү.
Урибе 2026-жылдагы президенттик шайлоого катышуу ниетин өткөн жылдын октябрында билдирген.
Богота шаарынын мэри Карлос Галан X платформасында Мигель Урибеге «тез арада медициналык жардам көрсөтүлгөнүн» жана «кол салган адам кармалганын» айтты.
Коргоо министри Педро Санчес чабуулдун артында тургандарды кармоого жардам берген маалымат үчүн болжол менен 700 миң доллар сыйлык сунушталганын жарыялады.
Министр Санчес армия менен полиция «кырдаалды чечүү стратегиясын иштеп чыгуу үчүн» жыйын өткөргөнүн айтты.
