АКШнын Борбордук командирлиги (CENTCOM) террористтердин коопсуз кармоочу жайларда калышын камсыз кылуу максатында Сириянын түндүк-чыгышынан Иракка ДЕАШ туткундарын өткөрүп берүү миссиясын баштаганын жарыялады.
Шаршемби күнкү билдирүүдө Хасеке провинциясынын түндүк-чыгышындагы кармоочу жайда жаткан 150 ДЕАШ террористин Ирактагы коопсуз жерге ийгиликтүү өткөрүп берүү менен миссиянын башталганы айтылды. Билдирүүдө: "Натыйжада Сириядан Ирактын көзөмөлүндөгү жайларга 7000ге чейин ДЕАШ туткундары которулушу мүмкүн", - деп кабарланды.
CENTCOM командири адмирал Брэд Купер АКШнын Ирак сыяктуу аймактык өнөктөштөр менен "тыгыз" координацияда экенин жана алардын ДЕАШты жеңүүдөгү ролун жогору баалаганын айтты. Купер: "ДЕАШ туткундарын тартиптүү жана коопсуз өткөрүп берүүгө көмөктөшүү АКШга да, аймактык коопсуздукка да түздөн-түз коркунуч келтире турган качуунун алдын алуу үчүн абдан маанилүү", - деди.
Бул кадам АКШнын Түркиядагы элчиси Том Баррак Вашингтондун Сириядагы артыкчылыктары азыр "элдешүүнү колдоого жана улуттук биримдик менен туруктуулукту өнүктүрүүгө" багытталганын айткандан бир күн өткөндөн кийин жасалды. Баррак АКШнын сепаратизмди колдобой турганын ачык айтып, "Вашингтондун артыкчылыктарына сепаратизмди же федерализмди колдобостон элдешүүнү колдоо жана улуттук биримдикти өнүктүрүү кирет" деп билдирди.
