Түркиянын энергетика министри Алпарслан Байрактар Дамаскка сапарында эки тараптуу жаңы энергетика келишиминин алкагында Түркиянын Сирияга жыл сайын эки миллиард куб метр жаратылыш газын бере турганын жарыялады.
Бул кадам он жылдан ашуун убакытка созулган жарандык согуштан кийин Анкаранын Сирияны кайра куруудагы ролунун жогорулап баратканын көрсөтөт.
Бейшемби күнү Сириянын энергетика министри Мухаммед аль Башир менен биргелешкен маалымат жыйынында сүйлөгөн сөзүндө Байрактар, газ экспорту Сирияда кошумча 1,300 мегаватт электр энергиясын өндүрүүгө жардам берерин жана өлкөнүн энергетика тартыштыгын жоюуга салым кошорун айтты.
Мындан тышкары Байрактар Түркия Сирияга кыска мөөнөттүү муктаждыктарын жабуу үчүн түздөн-түз 1,000 мегаватт электр энергиясын камсыздай турганын кошумчалады.
Газ түтүгүн кайра ишке киргизүү жана келечектеги долбоорлор
Аль Башир эки тарап Сирия менен Түркияны байланыштырган көптөн бери иштебей турган газ түтүгүн кайра ишке киргизүү боюнча макулдашканын, газ агымы июнь айында башталарын ырастады.
“Бул электр энергиясын өндүрүүнү олуттуу түрдө көбөйтүп, сириялыктардын электр энергиясына болгон муктаждыгына оң таасирин тийгизет,” - деди.
Эки министр ошондой эле эки өлкөнү байланыштырган 400 киловольттук электр линиясынын курулушун аяктоо маселесин талкуулашты. Бул линия жыл аягына чейин ишке кирип, Сирия Түркиядан 500 мегаваттка чейин электр энергиясын импорттой алат.
Түрк инвестициясы
Электр энергиясынан тышкары, келишим Түркиянын жеке секторунун Сириянын энергетика жана тоо-кен тармактарына инвестиция салуусуна жол ачат.
Байрактар түрк компаниялары тоо-кен, фосфат өндүрүү, электр энергиясын өндүрүү жана бөлүштүрүү боюнча мүмкүнчүлүктөрдү изилдөөгө чакырылганын белгиледи.
Байрактар: “Сирияда кургактыкта да, деңизде дагы жаңы булактардын табылышы боюнча интенсивдүү иштеп жатабыз”,- деди.
