Түркиянын тышкы иштер министри Хакан Фидан Түркия Палестинада эки мамлекеттүү чечим үчүн кепил болууга даяр экенин билдирди жана Шарм-эль-Шейхте жетишилген макулдашууну “Газа жана аймак үчүн тарыхый” деп атады.
Фидан ишемби күнү түрк ULKE TV телеканалына берген маегинде, эгер эки мамлекеттүү чечим ишке ашырылбаса, “бир аз убакыттан кийин дагы бир согушту көрүшүбүз мүмкүн” деп эскертти. Ошондой эле, учурдагы ок атышпоо режимин сактай албоо “согушту эмес, дагы бир геноцидди” алып келерин кошумчалады.
Фидан Түркиянын артыкчылыктуу багыттарын белгилеп, максат “макулдашуунун шарттарын сактоону камсыз кылуу, гуманитардык жардамдын жеткирилишин камсыздоо, палестиналыктардын Газаны башкаруусун колго алуусуна шарт түзүү жана эки мамлекеттүү чечимге карай чечкиндүү кадам таштоо” экенин айтты.
Ал Анкаранын максаты аймакта чыңалууну күчөтпөөнү жана туруктуу тынчтыкты орнотуу үчүн негиз түзүүнү көздөй турганын баса белгиледи.
Палестинанын мамлекеттүүлүгүнө жол
Түркиянын президенти Режеп Таййип Эрдоган Батыштын Палестинаны таануу аракеттерин дипломатиялык кадамдардан көрө, эки мамлекеттүү чечимдин пайдубалы катары мүнөздөгөн.
Президент Эрдоган бул темага байланыштуу сөзүндө:“Бул этапта эки мамлекеттүү чечимге карай аракеттерди күчөтүү маанилүү. Биз Батыш өлкөлөрүнүн, айрыкча Улуу Британия менен Франциянын Палестина мамлекетин таануу чечимдерин жөн гана таануу актысы катары эмес, эки мамлекеттүү чечимге алып баруучу жараяндын пайдубал кадамдары катары көрүүнү каалайбыз. Болбосо, жасалган кадамдар толук болбой, өз максатына жетпей калат”,-деп айткан.
Ал 1967-жылкы чек аралардын негизинде, Чыгыш Кудсту борбор кылган, көз карандысыз, эгемен жана географиялык жактан бириккен Палестина мамлекети жалгыз чечим экенин дагы бир жолу баса белгиледи.
