Түркиянын президенти Режеп Таййип Эрдоган Орусиянын президенти Владимир Путинге Анкара Орусия менен Украина согушу адилеттүү жана туруктуу тынчтык менен аяктоосу үчүн аракетин улантарын айтты.
Түркиянын Коммуникация башкармалыгынын маалыматы боюнча, Эрдоган менен Путин дүйшөмбү күнү телефон аркылуу сүйлөшүп, Орусия менен Украинанын ортосундагы согушту, ошондой эле аймактык жана глобалдык маселелерди талкуулашты.
Эрдоган Анкаранын тараптардын ортосундагы түз байланышты жеңилдете турган дипломатиялык демилгелерге салым кошууга даяр экенин баса белгилеп, бул узак мөөнөттүү тынчтыкка жол ачарын билдирди.
Жекшемби күнү G20 лидерлеринин саммитинин алкагында басма сөзгө маалымат берген Эрдоган Түркия Жакынкы Чыгыштан Африкага жана Украинага чейинки чыр-чатак аймактарындагы эл аралык тынчтык аракеттерине катышууну уланта берерин айтып, Анкаранын глобалдык кризистерди чечүүдөгү негизги актер катары ролун баса белгиледи.
Эрдоган ошондой эле лидерлердин саммитинде орусиялык кесиптешине Кара деңиздеги дан коридорун жандандыруу маселесин талкуулоо үчүн телефон аркылуу байланыша турганын айтып, «дан коридору боюнча аракеттерибиз чындыгында тынчтыкка жол ачууга багытталган» деди.
Президент кошумчалап: «Эгерде биз бул процессти баштасак, бул абдан пайдалуу болот деп ойлойм»,-деди.
Эрдоган Түркия жаңжалды токтотуу үчүн колунан келгендин баарын жасай турганын жана бардык варианттарды карай турганын билдирди. Ал мындай деп кошумчалады: «Дагы көп адам каза болду. Мен аны менен бул өлүмдөрдү токтотуу үчүн кандай кадамдарды жасай аларыбызды талкуулайм жана бул талкуулардан кийин европалыктар, Трамп мырза жана башка досторум менен натыйжаны талкуулоо мүмкүнчүлүгүнө ээ болом деп ишенем».
