АКШнын президенти Дональд Трамптын Иранга чектелген чабуул коюуну карап жатканы тууралуу билдирүүсүнөн кийин, Тегеран администрациясы дүйшөмбү күнү Американын ар кандай, атүгүл чектелген чабуулу да «агрессия актысы» деп эсептелип, жооп кайтарууга алып келерин жарыялады.
Ирандын Тышкы иштер министрлигинин басма сөз катчысы Исмаил Бекайи: «Менин оюмча, чектелген чабуул деген нерсе жок. Агрессия актысы агрессия актысы деп эсептелет. Болду. Кайсы мамлекет болбосун өзүн-өзү коргоо укугунун алкагында агрессия актына катаал жооп кайтарат; биз да ошондой кылабыз», - деди.
Жакынкы Чыгышта Американын кеңири масштабдагы аскердик күчтөнүүсүнөн кийин, АКШнын Иранга каршы аскердик аракеттерге карата коркутуулары көбөйдү.
Ирандын тышкы иштер министри Аббас Аракчи жекшемби күнү CBS News телеканалына: «Эгер АКШ бизге кол салса, анда биз өзүбүздү коргонууга толук укуктуубуз», - деп айтып, ошол эле учурда «дипломатиялык чечимге жетүү мүмкүнчүлүгү жогору» деп билдирди.
Ирандын президенти Масуд Пезешкиан дагы социалдык медиадагы билдирүүсүндө Америка тарап менен болгон мурунку сүйлөшүүлөрдө «дем берүүчү белгилер» болгонун билдирди.
Женевадагы акыркы сүйлөшүүлөрдөн кийин Иран аскердик кийлигишүүнү болтурбоо боюнча келишим тууралуу сунуштун долбоорун даярдаганын жарыялады.
Аракчи CBS телеканалына: «Менимче, ушул бейшемби күнү Женевада кайрадан жолукканда, биз бул элементтердин үстүндө иштеп, жакшы текст даярдап, тез арада келишимге жетише алабыз», - деди.
АКШ акыркы жумаларда аймактагы абадан коргонууну күчөтүп, аскердик аракеттердин коркунучтарын колдоо үчүн Жакынкы Чыгышка эки учак ташуучу кемени, ошондой эле учактарды жана кемелерди жөнөттү.
