Исмаил Бекаи Тегеранда өткөн жумалык басма сөз жыйынында учурдагы окуяларга баа берди.
Ирандын АКШ менен сүйлөшүүлөрдү баштоону каалап жатат деген дооматтарын төгүнгө чыгарган Бекаи: «Эки өлкөнүн ортосундагы кагылышуулар токтогон болсо да, учурда Иран менен АКШ эч кандай сүйлөшүү жүргүзгөн жок», — деди.
Ирандын керек болгон учурда коргонуу, керек болгондо дипломатиялык каражаттарды колдоноорун айткан Бекаи: "Биз АКШга согуш жана тынчтык мезгилин аныктоого эч качан жол берген эмеспиз жана эч качан жол бербейбиз", - деди.
Ормуз кысыгындагы кырдаал
Бекаи Тегеранда Оман делегациясы менен Ормуз кысыгында кемелердин өтүү эрежелери боюнча өткөрүлгөн жолугушуулардын түшүмдүү өткөнүн билдирди жана АКШнын бул жолугушууларга эч кандай тиешеси жок экендигин, учурда АКШ менен сүйлөшүүлөрдү жүргүзбөгөндүгүн кошумчалады.
Бекаи Ормуз кысыгындагы кырдаал өзгөргөн жок жана кысык кемелердин жүрүшү үчүн жабык бойдон калууда деп билдирди.
"Украинанын кооптуу окуясы жоопсуз калбайт"
Украинанын Каспий деңизинде Иранга таандык кемени бутага алып, чабуулдан бир моряктын каза болгону жана Украинанын президенти Владимир Зеленскийдин АКШ президенти Дональд Трамп менен жолугушары эске салынып, Бекаи буларды айтты: «(Кемеге жасалган чабуул) Бул кадамды алар өздөрүнүн чыныгы кожоюндары катары көргөн тараптарга жагынууга болгон аракет катары чечмелесе болот. Бул биригүүнү (АКШ, Израиль, Украина) заардуу үч бурчтук деп атоого болот. Мындай үч бурчтуктар эл аралык тынчтыкка эч качан салым кошкон эмес, тескерисинче туруктуулукту бузган. Зеленскийдин кожоюндары өздөрүн ооздукташы керек. Украинанын мындай коркунучтуу авантюрасы жоопсуз калбайт».
