Азербайжандын президенти Илхам Алиев АКШ менен Израилдин Иранга каршы уланып жаткан согушу учурунда Тегеранга гуманитардык жардам жөнөтүү буйругун берди.
Азербайжандын АРА мамлекеттик маалымат агенттигинин шейшемби күнкү кабарына караганда, Иранга 10 тонна ун, 2 тоннага жакын дары-дармек жана медициналык каражаттар, ошондой эле башка зарыл болгон буюмдар жөнөтүлдү.
Агенттик билдиргендей: «Азербайжандын Өзгөчө кырдаалдар министрлигинин унаалары менен Иран Ислам Республикасына жөнөтүлгөн жардамдын курамында 10 тонна ун, 6 тонна күрүч, 2,4 тонна кумшекер, 4 тоннадан ашык суу, 600 кг чай жана 2 тонна медициналык каражаттар бар».
Бул жардам Азербайжан менен Ирандын чек арасындагы кыймылды убактылуу үзгүлтүккө учураткан акыркы дрон окуясына карабастан ишке ашты. Азербайжан дүйшөмбү күнү Иран менен чек ара бекеттерин бардык жүк ташуучу унаалар үчүн кайрадан ачканын жарыялады.
Россиянын ТАСС агенттиги билдиргендей, Иранды союздашы Россия менен байланыштырган эң кыска кургак жолдордун бири болгон бул өтмөктөр өткөн аптада Нахичеван аймагындагы дрон чабуулунан кийин жабылган.
Ирандын президенти Месуд Пезешкиан жекшемби күнү кечинде кесиптеши Илхам Алиевге телефон чалып, Тегерандын бул чабуулдарга тиешеси жок экенин билдирди жана окуяны иликтөө убадасын берди.
Алиевдин аппаратынын билдирүүсүндө: «Президент Месуд Пезешкиан Нахичеванга жасалган аба чабуулунун Иранга эч кандай байланышы жок экенин белгилеп, окуянын иликтенерин баса белгиледи», — деп айтылды.
Азербайжандык жетекчилер бейшемби күнү төрт дрондун Нахчиван аймагында чек арадан өткөнүн жана төрт адамды жаралагандыгын билдирген.
Эскерте кетсек, 28-февралда АКШ менен Израилдин Иранга каршы баштаган чоң мащстабдуу чабуулдарынан кийин Жакынкы Чыгышта чыңалуу күчөгөн. Бул чабуулдарда мурдагы диний лидер Али Хаменеи баш болгон 1300дөн ашуун адам каза болду.
Тегеран болсо Израиль жана АКШнын базалары жайгашкан Перс булуңундагы өлкөлөргө багытталган дрон жана ракеталык чабуулдар менен жооп кайтарды.
