Палестинанын Саламаттыкты сактоо министрлиги жекшемби күнү израилдик аскерлер оккупацияланган Батыш Шерианын түндүгүндө палестиналык жубайларды жана алардын эки баласын атып өлтүргөнүн жарыялады.
Палестинанын Кызыл Жарым Ай коому ошондой эле анын экипаждары Таммун шаарында израилдик күчтөр тарабынан атылган унаадан эки чоң кишинин жана эки баланын сөөктөрүн тапканын билдирди.
Израиль армиясы AFP агенттигинин комментарий берүү өтүнүчүнө жооп катары окуя тууралуу маалыматтарды иликтеп жатканын билдирди.
Рамаллада жайгашкан Палестинанын Саламаттыкты сактоо министрлиги «Таммунда оккупациялык армиянын ок атуусунан улам бир үй-бүлөдөн төрт шейит Тубастагы Түрк мамлекеттик ооруканасына жеткирилгенин» билдирди.
Билдирүүдө 37 жаштагы эркек кишинин, 35 жаштагы аялдын жана беш жана жети жаштагы эки баланын сөөктөрү ооруканага жеткирилгени, алардын баарында октун жаралары болгону айтылат.
Палестинанын WAFA маалымат агенттиги жекшемби күнү эртең менен израилдик күчтөр алардын унаасына ок чыгарганда жубайлардын сегиз жана 11 жаштагы дагы эки баласы октун сыныгынан жаракат алганын билдирди.
Палестиналык расмий өкүлдөр жана Бириккен Улуттар Уюму акыркы күндөрү оккупацияланган Батыш Шериада көбүнчө мыйзамсыз израилдик отурукташкандар тарабынан жасалган өлүмгө алып келүүчү кол салуулар көбөйгөнүн, март айынын башынан бери кеминде беш палестиналык өлтүрүлгөнүн билдиришти.
Израиль армиясы ноябрь айында Тубастын айланасын кошо алганда, оккупацияланган Батыш Шерианын түндүкгүндө палестиналык топторго каршы операция баштаган.
1967-жылдан бери Израилдин оккупациясында болгон Батыш Шериадагы зомбулук 2023-жылдын октябрында Газа согушу башталгандан бери кескин көбөйүп, 2025-жылдын 10-октябрында күчүнө кирген ок атышууну токтотууга карабастан улантылган.
Франс Пресс агенттигинин Палестинанын Саламаттыкты сактоо министрлигинин маалыматтарына негизделген эсептөөлөрүнө ылайык, Газа согушу башталгандан бери Батыш Шериада израилдик аскерлер же мыйзамсыз отурукташкандар тарабынан кеминде 1045 палестиналык набыт кылынган.
Оккупацияланган Батыш Шериада болжол менен үч миллион палестиналык, ошондой эле эл аралык укук боюнча мыйзамсыз деп эсептелген конуштарда жана посттордо жашаган 500 000ден ашык израилдик жашайт.
