Индонезияда исламдык жатак мектептин имараты урап түшкөндөн кийин каза болгон окуучулардын саны 16дан 36га жетти деп билдирди өлкөнүн өзгөчө кырдаалдарды башкаруу агенттиги.
27 окуучунун сөөгүн издөө иштери жети күндөн бери уланууда. Алардын көбү 13 жаштан 19 жашка чейинки өспүрүм балдар экени айтылды. Агенттиктин маалыматы боюнча, алар имараттын урандыларынын астында калышкан.
Крандар колдонулуп, урандыларды казуу иштери жүргүзүлүүдө. Агенттиктин маалыматына ылайык, издөө жана эвакуация иштеринин 60 пайызы аяктап, дүйшөмбү күнү бардык калдыктар тазаланып, издөө иштери жыйынтыкталат деп күтүлүүдө.
Чыгыш Ява провинциясындагы Сидоаржо шаарында жайгашкан Аль Хозини мектеби өткөн дүйшөмбү күнү урап түшкөн. Имараттын пайдубалы жогорку кабаттардагы курулуш иштерин көтөрө албай, түшкү намаз учурунда жүздөгөн өспүрүм окуучулардын үстүнө кулап калган.
Жашоо белгилерин табуу мүмкүн болбой калды
Жума күнү куткаруучулар ата-энелердин уруксаты менен оор техникаларды колдонууга киришти. Анткени анын алдындагы аракеттерде жашоо белгилери табылган эмес.
Куткаруучулар имараттын урандыларындагы туннелдерди казып, балдардын аттарын чакырып, кыймылдарды аныктоочу сенсорлорду колдонушту. Бирок жашоо белгилери табылган жок.
Аль Хозини — жергиликтүү тилде "песантрен" (ислам медресеси) деп аталган исламдык жатак мектеп. Индонезия — дүйнөдөгү эң чоң мусулмандар көпчүлүктү түзгөн өлкө. Дин иштери министрлигинин маалыматы боюнча, өлкөдө 42 миңге жакын песантрен бар жана аларда 7 миллион окуучу билим алат.
