Украина орус аскерлери алдыга жылып бараткан фронт тилкесиндеги Запорожье жана Днепропетровск аймактарынан миңдеген бала жана үй-бүлөлөрүн эвакуациялоо чечимин чыгарды.

Украинанын кайра куруу министри Алексей Кулеба жума күнү Telegram аркылуу жасаган билдирүүсүндө: «Коопсуздук абалынын татаалдашына байланыштуу Запорожье жана Днепропетровск облустарындагы фронтко жакын 44 калктуу конуштан 3 миңден ашык баланы жана ата-энелерин милдеттүү түрдө эвакуациялоо чечими кабыл алынды», — деп билдирди.

Кулеба эвакуациялоо иштеринин Москванын союздашы болгон Беларусь менен чектешкен жана Россиянын бомбалоосуна дуушар болгон Чернигов облусунда да уланып жатканын белгиледи.

Министр 1-июндан бери фронттогу аймактардан коопсуз жерлерге жалпысынан 150 миң адам эвакуацияланганын, алардын ичинде 18 миңге жакын бала жана 5 миңден ашык мүмкүнчүлүгү чектелген адам бар экенин айтты.

Россия 2022-жылдын февралында баштаган аскердик операциясынан кийин Украинанын өнөр жай аймактарынын бири болгон Днепропетровск багытында илгерилөөсүн улантууда. Түштүктөгү Запорожье облусунда болсо Россиянын алдыга жылышы чектелүү болгонуна карабастан акыркы айларда ылдамдады.

Москва жакында эки аймакта тең жаңы конуштарды басып алганын билдирди. Россия 2022-жылдын сентябрь айында Запорожье, Донецк, Луганск жана Херсон облустарын аннексиялаганын жарыялаган, бирок алардын баарын толук аскердик көзөмөлгө алган эмес.