Техаста куткаруучулар убакыт менен жарышып, капыстан болгон селден улам жоголгон ондогон адамдарды, анын ичинде балдарды издеп жатышат. Бул сел кеминде 82 адамдын өмүрүн алды, ал эми аба ырайы боюнча адистер жаңы сел коркунучун эскертишүүдө.
АКШ президенти Дональд Трамп жекшемби күнү түштүк штатка жума күнү "балким" барарын айтты.
Президент өз администрациясынын аба ырайын алдын ала айтуучу жана тиешелүү федералдык агенттиктерге болгон каржылоону кыскартуулары жергиликтүү эскертүү системаларына терс таасирин тийгизди деген тынчсызданууларды четке какты.
Тескерисинче, Трамп бул селди "100 жылда бир болуучу кырсык" деп мүнөздөп, "мындай нерсени эч ким күткөн эмес" деп билдирди.
Техастын борбордук бөлүгүндөгү Керр округунда 40 чоң киши жана 28 бала каза болгонун шериф Ларри Лейта билдирди. Ошондой эле, жакынкы аймактарда дагы кеминде он адам селден улам каза тапкан.
Техастын коомдук коопсуздук боюнча башчысы Фриман Мартин басма сөз жыйынында: "Бүгүн каза болгондордун саны дагы көбөйөт" деп эскертти.
Техас губернатору Грег Эбботт: "Штат боюнча селден жабыркаган аймактарда 41 адам жоголгон деп катталды",-деп билдирди.
Кемпингдери менен популярдуу болгон аймакта эскертүүлөр эмнеге эртерээк берилбегени же адамдар эмнеге алдын ала эвакуацияланбаганы тууралуу суроолор көбөйгөндө, Трамп бул кырдаалды "Байдендин уюштуруусу" деп атады.
Трамп жекшемби күнү журналисттерге: "Бул биздин уюштуруубуз эмес",- деп айтып, Улуттук аба ырайы кызматынын (NWS) кызматкерлерин кайра жумушка алуу ниети жок экенин билдирди.
Федералдык өзгөчө кырдаалдар агенттигин (FEMA) жоюу пландары боюнча суроолорго ал: "FEMA тууралуу кийинчерээк сүйлөшөбүз",-деп жооп берди.
Мурда Трамп өзгөчө кырдаалдарга жардам берүү штаттын деңгээлинде чечилиши керек деп айткан болчу. Ошондой эле ал Техас үчүн каражаттарды бөлүүгө жол ачкан чоң өзгөчө кырдаал жарыясына кол койду.
Жоголгон кыздар
Техастын борбордук бөлүгүндө 17 тик учак жоголгон адамдарды, анын ичинде дарыянын жээгиндеги христиан жайкы лагеринде жоголгон он кызды жана бир кеңешчини издөө иштерине катышты. Бул лагерде кырсык болгон учурда 750гө жакын адам болгон.
Табияттын коркунучтуу күчүн көрсөткөн бул окуяда, Гуадалупе дарыясынын суулары жума күнү түнү кыздар уктап жатканда бактардын учуна жана лагердеги кабинадардын чатырына чейин жетип, айрымдарын агызып кетип, аймак кыйрап калды.
Лагердеги жууркан, оюнчуктар жана башка буюмдар ылайга чыланып калган. Кабиналардын терезелери, сыягы суунун күчү менен сынган.
Улуттук аба ырайы кызматы (NWS) жекшемби күнү борбордук Техастын нымдуу жерлеринде жай кыймылдаган бороондор дагы сел коркунучун жаратышы мүмкүн деп эскертти.
Губернатор Эбботт Керрвилл жана анын айланасындагы аймактарда катуу жаан-чачын "сел коркунучун жаратышы мүмкүн" деп эскертти. Ошондой эле бийлик өкүлдөрү адамдарды толуп кеткен дарыяга жана анын агымдарына жакындабоого чакырышты.
Сел 4-июлдагы майрам күндөрүнүн башталышында, бир нече айлык жаан-чачын бир нече сааттын ичинде жаап, көпчүлүгү түн ичинде адамдар уктап жатканда болгон.
Гуадалупе дарыясы болгону 45 мүнөттүн ичинде 26 футка (сегиз метрге) көтөрүлүп, эки кабаттуу имараттын бийиктигинен ашып кеткен.
