НАТО Арктика аймагында эки жылда бир өткөрүлүүчү аскердик машыгууларын дүйшөмбү күнү баштады. Бул жылкы машыгууларда аскердик операцияларды колдоодогу жарандардын ролуна өзгөчө басым жасалууда.
Бул машыгуулар АКШнын президенти Дональд Трамптын Гренландияны Даниядан (НАТОнун мүчөсү) тартып алуу боюнча талаш-тартыштуу аракетинен кийин чыңалуу күчөгөн учурда өтүп жатат.
«Суук каршылык» деп аталган бул машыгуулар НАТОго мүчө Норвегия жана Финляндиянын Россия менен чектешкен Арктиканын Европа бөлүгүн коргоого багытталган.
Бул жылкы машыгуулар 9-марттан 19-мартка чейин уланат.
Бул иш-чара НАТОнун полярдык аймактагы таасирин күчөтүү максатын көздөгөн «Арктика күзөтү» (Arctic Watch) миссиясынын бир бөлүгү болуп саналат. Бул кадам Трамптын Гренландия боюнча демилгесинен улам келип чыккан чыңалууну басаңдатуу үчүн долбоорлонду.
Трамп АКШнын Арктикадагы Россия жана Кытайдын кызыкчылыктарынан келүүчү коркунучтарга каршы Гренландияга муктаж экенин жана Даниянын аралдын коопсуздугун камсыздай албастыгын жактоодо.
Дания менен Гренландиянын өкмөттөрү аралдын сатылбай турганын айтышууда.
Жарандык даярдыкка басым жасоо
Норвегия 2026-жылды «Жалпы коргонуу» жылы деп жарыялады. Бул демилге согуш жана башка өзгөчө кырдаалдар учурунда жарандардын, ишканалардын жана мамлекеттик мекемелердин даярдыгын жогорулатууга багытталган. Бул кадам өлкөнүн жарандык коргонуусун чыңдоо боюнча көрүлүп жаткан акыркы чаралардын бири болуп саналат.
Норвегиянын куралдуу күчтөрүнүн командири, генерал-майор Ларс Лервик Reuters агенттигине берген маегинде: «Биз армиябыздын өлкөнү коргоо милдетин толук аткарышын каалайбыз. Ал үчүн коомдун көпчүлүк тармактары кадимки тартипте иштеши зарыл», — деди.
Генерал: “Бул ошол эле учурда мисалы саламаттыкты сактоо кызматынын көптөгөн жаралуу аскерди дарылоо сыяктуу жарандардын аскердик аракеттерге түздөн-түз колдоо көрсөтө ала турган мүмкүнчүлүктөрүн текшерүүгө шарт түзөт”,- деди.
Бейшемби күнү Норвегиянын түндүгүндөгү ооруканаларда Финляндиядагы болжолдуу фронттон келген көп сандагы жарадарларды кабыл алуу жана дарылоо мүмкүнчүлүгүн текшерген атайын машыгуу сценарийи ишке ашырылат.
