Филиппиндин түштүгүндөгү куткаруучу топтор шаршемби күнү кулаган супермаркеттин урандыларынын арасынан сөөктөрдү алып чыгышты, ушундайча кыйратуучу жер титирөөдөн каза болгондордун саны 46га жетти.
Дүйшөмбү күнү Минданаонун жээгинде болгон 7,8 баллдык жер титирөө түштүк аралдын кеңири аймагында имараттардын урашына, жер көчкүлөрдүн жүрүшүнө жана цунами эскертүүлөрүнө алып келди.
39 жаштагы Жой Делувио, Генерал Сантос шаарындагы супермаркетте иштеген эки адамдын бири эле. Издөө-куткаруу иштери кайталанган жер титирөө ыктымалдуулугуна карабастан уланууда.
Жергиликтүү куткаруучу Мишель Чуа шаршемби күнү AFP агенттигине Делувионун сөөгү эки устундун ортосунда кыпчылып калган абалда табылганын айтты.
Каза болгондордун саны көбөйүшү мүмкүн
Филиппиндин улуттук апаат агенттиги шаршемби күнү каза болгондордун саны 45ке жеткенин, дайынсыз жоголгондордун саны төрттөн 17ге көбөйгөнүн жарыялады.
Бирок жарандык коргонуу кеңсеси Делувионун каза болгондордун санына кирбегенин ырастады.
Жарандык коргонуунун кызматкери Рафаэлито Алехандро радиого берген маегинде, жаңы аныкталган өлүмдөрдүн көпчүлүгү Давао-Оксентал провинциясынан болгонун жана алар жер көчкүлөрдө же кулаган имараттарда катталганын айтты.
