Палестинаны колдогон демонстранттар Израилдин президенти Исаак Герцогдун төрт күндүк Австралия сапарын аякташы менен бирге бейшемби күнү Мельбурнда көчөлөргө чыгууга даярданышууда. Буга чейин Канберрада да демонстрациялар өткөрүлүп, Сиднейде полиция менен катуу кагылышуулар болгон.
14-декабрда Бонди Бичте Ханука майрамында өлүмгө алып келген куралдуу кол салуудан кийин премьер-министр Энтони Албаниздин чакыруусу менен ишке ашкан сапар, өлкө боюнча кызуу талкууларды жаратты.
Сынчылар Герцогду Израилдин Газадагы аскердик чабуулдарына орток болуу менен айыпташууда; БУУнун иликтөө комиссиясынын израилдик жетекчилердин геноцид аракеттерине шыкакчы болгону тууралуу корутундуларына шилтеме кылышууда. Израиль болсо бул айыптоолорду «скандал» жана жалган деп атап, четке кагууда.
Бейшемби күнү Мельбурндагы чоң темир жол станциясына жакын жерде өтө турган митингди уюштуруп жаткан «Палестина үчүн студенттер» тобунун тең төрагасы Жасмин Дафф: «Австралиялыктарга айта турган билдирүүбүз: эми — жүрүшкө чыга турган убакыт. Өлтүрүлгөн бардык палестиналыктар үчүн жана ачарчылыктан кыйналып жаткан тирүүлөр үчүн», — деди.
Мельбурн университетинде «Герцогго өлүм» деген чакырыктар жазылган граффитилер тууралуу полицияга кабарланды. Бирок бийлик өкүлдөрү мунун пландалган нааразычылык акциялары менен байланышы бар экенине эч кандай далилдин жок экенин билдиришти.
Полиция демонстранттарды таратуу үчүн көздөн жаш агызчу газ жана калемпир газын колдонду
Аптанын башында Сидней жана Канберрага барган Герцог Австралияда антисемитизмдин деңгээли «коркунучтуу» абалда экенин айтты, бирок австралиялыктардын көбү тынчтыкты жана диалогду каалай турганын баса белгиледи. Ал эми геноцид боюнча айыптоолорду «жалган» деп мүнөздөдү.
Дүйшөмбү күнү Сиднейде полиция менен демонстранттардын ортосунда чыккан кагылышууларда 27 адам камакка алынды.
Полиция кызматкерлери ишканалар жайгашкан аймакта чогулган элди таратуу үчүн көздөн жаш агызуучу газ жана калемпир газын колдонушту.
Нааразычылык акциялары Газадагы геноциддин Жакынкы Чыгыштан тышкары да коомду жикке бөлүүчү таасири бар экенин көрсөтүүдө. Австралия да эми сөз эркиндиги, коомдук тартип жана күчөп жаткан социалдык чыңалуу маселелери боюнча ички карама-каршылыктарга туш болууда.
