Энергетика жана жаратылыш ресурстары министри Алпарслан Байрактар Сауд Арабия менен ири көлөмдөгү күн энергиясы долбоорлорун камтыган болжол менен 2 миллиард долларлык энергетикалык инвестиция келишимине кол коюлганын жарыялады.
Байрактар Сауд Арабиянын борбору Эр-Риядда Түркия Республикасынын өкмөтү менен Сауд Арабия Падышачылыгынын өкмөтүнүн ортосунда Кайра жаралуучу энергия станцияларынын долбоорлору боюнча өкмөттөр аралык келишимге сауд кесиптеши менен кол коюшканын билдирди.
Энергетика жана жаратылыш ресурстары министри Байрактар Сауд компаниялары Түркияда жалпы кубаттуулугу 5000 мегаватт болгон күн жана шамал электр станцияларын курарын кошумчалады.
Инвестициянын биринчи этабы катары Борбордук Анадолудагы Сивас жана Караман облустарында жалпы кубаттуулугу 2000 мегаватт болгон күн электр станцияларынын долбоорлору ишке ашырылат.
Байрактар: "Биз Түркияда көргөн эң төмөнкү баада электр энергиясын сатып алабыз. Бул 2000 мегаватттык биринчи этап болжол менен 2 миллиард долларлык инвестицияны билдирет. Ошондой эле өлкөбүзгө түз чет элдик каржылоо келерин туюнтат. Мунун бир бөлүгү жергиликтүү ресурстардан, бир бөлүгү да эл аралык каржы кекемелеринен камсыздалат", - деди.
Министрдин билдирүүсүнө ылайык, Караманда курула турган станциядан 25 жыл бою киловатт-саатына 1,995 евродон, ал эми Сиваста курула турган станциядан киловатт-саатына 2,3415 евродон электр энергиясы сатып алынат.
Байрактар долбоорлордун 50 пайызы ата мекендик өндүрүшкө багытталганын жана курулуш иштери 2027-жылы башталаары күтүлүп жатканын билдирди.
Биринчи баскычтын 2027-жылдын аягына чейин, ал эми долбоордун толугунун 2028-2029-жылдары бүткөрүлүшү пландаштырылууда.
Байрактар ошондой эле Сауд Арабия менен Түркиянын ортосунда электр берүү линиясын жана өз ара байланыш долбоорун кошо алганда, электр энергиясы тармагындагы узак мөөнөттүү кызматташуу талкууланганын кошумчалады.
Байрактар шейшемби күнү Эр-Риядга сапарында президент Режеп Таййип Эрдоганды коштоп барган делегациянын курамында болду.
