“АКШ менен Малайзия стратегиялык жарандык өзөктүк кызматташтык боюнча өз ара түшүнүшүү меморандумуна кол коюшту”, деп билдирди АКШнын Мамлекеттик департаменти.

АКШнын Мамлекеттик катчысы Марко Рубио жана Малайзиянын Тышкы иштер министри Мохамад Хасан бейшемби күнү Куала-Лумпурда өткөрүлгөн кол коюу аземине катышып, бул келишимди расмий түрдө бекитишти.

АКШнын Мамлекеттик департаменти жарыялаган протоколго караганда Хасан, кызматка киришкенден бери аймакка биринчи сапарын жасаган Рубиону жылуу тосуп алып, Малайзиянын АКШ менен 123 келишими боюнча сүйлөшүүлөрдү баштоого даяр экенин билдирди.

123 келишими АКШ менен башка өлкөнүн ортосундагы тынчтыкчыл максаттагы өзөктүк кызматташтыкты камтыйт.

Тынчтыкчыл максаттагы өзөктүк кызматташтык

“Бүгүнкү күн стратегиялык жарандык өзөктүк кызматташтык боюнча өз ара түшүнүшүү меморандумуна кол коюлушунда маанилүү этапты билдирет. Бул өз ара түшүнүшүү меморандуму Малайзия менен АКШнын ар тараптуу өнөктөштүгүн бекемдөөгө багытталган жалпы жолубуздагы маанилүү кадам болуп саналат”, - деди.

Хасан кошумчалагандай, келишим энергетикалык коопсуздукту камсыз кылууга, экономикалык өсүүгө көмөктөшүүгө жана Малайзиянын өзөктүк энергияны коопсуз, ишенимдүү жана жоопкерчиликтүү пайдалануу мүмкүнчүлүгүн жогорулатууга жардам берет.

Рубио келишимди тынчтыкчыл өзөктүк кызматташтыктын маанилүү мисалы катары мүнөздөдү.

“Менимче бул биринчи кезекте дүйнөгө жарандык өзөктүк кызматташтык кандайча ишке ашырылса болорун көрсөтүүчү белги болуп саналат”, - деди.

“Дүйнө жүзүндө жарандык өзөктүк программаларга кызыккан көптөгөн өлкөлөр бар. Бул аны кантип ишке ашырууга болоруна мисал болуп саналат. Биз муну ушундай жакын өнөктөш менен ишке ашыра алганыбызга абдан кубанычтабыз”, - деп кошумчалады Рубио.

Ал ошондой эле Малайзиянын 123 келишими боюнча сүйлөшүүлөрдү баштоого даяр экенин жарыялашын кубаттады.

Рубио АСЕАНдын тышкы иштер министрлеринин жыйынына катышуу үчүн бейшемби күнү Куала-Лумпурга барды.