Орусиянын аба соккусу Харьков шаарынын түндүк-чыгышында бир адамдын өмүрүн алып, 40тан ашуун адамды жарадар кылды деп билдирди Украинанын президенти Владимир Зеленский.
Зеленский бул сокку балдар үчүн темир жол темасындагы паркка жакын жайгашкан жарандык инфраструктураны бутага алганын айтып, аны “террордук чабуул” деп атады.
«Биз буга көңүл бурбай коё албайбыз. Биз көзүбүздү жума албайбыз. Бул оюн эмес. Биз күн сайын адамдарды жоготуп жатабыз, анткени Орусия жазасыз калам деп ойлойт», - деди Зеленский ишемби күнү Telegram баракчасында.
Ал орус аскерлери Украинага “өлүм жана кыйроо” алып келип жатканын жана тынчтык сүйлөшүүлөрүнө барууга даяр эместигин айтты.
“Орустар согушту улантууга даярданып жатышат жана бардык тынчтык сунуштарын четке кагышууда,” - деди Зеленский.
Ал Москвага карата эл аралык басымды күчөтүүгө чакырып, Орусия буга чейин сүйлөшүү үстөлүнө сырткы басымдын натыйжасында гана отурганын белгиледи.
Зеленский ошондой эле фронттогу абалды талкуулоо үчүн аскердик жетекчилер менен жолугушканын айтты.
Ал украиналык күчтөр орусиялык Су-35 аскердик учагын атып түшүргөнүн жана акыркы күндөрдө үч орусиялык Искандер ракеталык системасын жок кылышканын кошумчалады.
