Израилдин коомдук телеканалы KANдын шаршемби күнкү кабарына караганда, Израиль барымтадагы төрт адамдын сөөгүн кайтарып алгандан кийин Газа менен Египеттин ортосундагы Рафах чек ара бекетин ачуу жана Газага гуманитардык жардамдын өтүшүнө уруксат берүү чечимин кабыл алды.

Кабарда Израилдин ХАМАСка каршы пландаган жана аймакка кирген гумжардам ташыган унаалардын санын эки эсе кыскартуу чараларын жокко чыгарганы айтылды.

Мурда Рафахты жабык кармоо чечими Хамас АКШ ортомчулугу менен түзүлгөн ок атышпоо боюнча жаңы келишимге ылайык туткундардын сөөгүн берүүдөн баш тартып, аларды табуу кыйын экенин айткандан кийин кабыл алынган.

Израиль жардам жүктөрүн чек аранын Палестина тарабында түшүрүүнү, андан кийин Газадагы БУУ жана башка жардам уюмдары тарабынан чогултулушун талап кылууда.

ЮНИСЕФтин өкүлү Рикардо Пирес “Бардык чек ара өткөөлдөрү ачык болушу керек. Рафах канчалык узак жабык турса, өзгөчө түштүктө жер которгон адамдар үчүн Газадагы азап ошончолук узарат,” - деди.

АКШнын президенти Дональд Трамп дүйшөмбү күнү Израилдин Газадагы согушунун аяктаганын жарыялады. Акыркы израилдик туткундардын палестиналык туткундарга алмаштырылышы жардамдар тез арада аймакка жеткирилет деген үмүттү арттырды. Ачкачылыкты көзөмөлдөөчү глобалдык уюм жүз миңдеген адамдар ачарчылыктан өлүү коркунучунда турганын эскертти.

“Биз дагы эле аз сандагы жүктөрдүн кирип жатканын көрүп жатабыз жана бул жүктөргө чоң топтор чогулуп, гуманитардык стандарттарга такыр туура келбеген шартта бөлүштүрүлүүдө,” - деди Эл аралык Кызыл Чырым комитетинин өкүлү Кристиан Кардон Женевада шейшемби күнү журналисттерге.

БУУнун Дүйнөлүк азык-түлүк программасы шейшемби күнкү маалыматында, дем алыш күндөрдөн бери 137 жүк ташуучу унаа киргизилгенин билдирди. Жардам агенттиктери Газадагы бир нече аптадан бери жардам ала элек 400 миң кишиге жүктөрдү тез арада жеткирүүнү максат кылууда.