Бекайи борбор шаар Тегеранда өткөн жумалык басма сөз жыйынында учурдагы маселелерге байланыштуу баа берди.

Оман менен өткөрүлгөн сүйлөшүүлөр Ормуз кысыгында кемелердин коопсуз өтүүсүн камсыз кылуу максатында жаңы жана убактылуу маршрутту белгилөөгө багытталганын айткан Бекаи буларга токтолду: «АКШ менен эч кандай сүйлөшүүлөрдү жүргүзгөн жокпуз. Оман менен болгон сүйлөшүүлөр Ормуз кысыгында кемелердин коопсуз өтүүсүн камсыздоого багытталган. АКШнын деңиз блокадасы жана соккулары улантылган сайын Ормуз кысыгында учурдагы кырдаал өзгөрбөйт».

Учурда арачылык кылып жаткан өлкө Пакистан экенин, ал эми Катар бул аракеттерге колдоо көрсөтүп жатканын белгилеген Бекаи Кытайдын да аймактагы чыр-чатак жана коопсуздуктун начарлашынан тынчсызданып, кырдаалдын мындан ары курчуп кетишине жол бербөө үчүн аракет кылып жатканын айтты.

Иранга карата "агрессивдүү позицияны" күч жана коркутуу менен гана токтотууга болорун айткан Бекайи АКШнын Ирандын гана эмес, аймактагы бардык өлкөлөрдүн коопсуздугуна коркунуч келтирерин билдирди.

АКШнын аймактагы аскердик базаларды колдонушу туруксуздукту күчөтөрүн айткан Бекайи АКШнын президенти Дональд Трамптын Иранга каршы катаал билдирүүлөрүнө байланыштуу: "Ирандык бойдон калалы. Биздин өзүбүздүн адеп-ахлагыбыз бар. Башкалардын катаал сөздөрүн үлгү катары кабыл аларыбызды ойлобойм", - деди.

Украинанын Каспий деңизинде Иранга таандык кемеге кол салуусу тууралуу сөз сүйлөгөн Бекайи украиналык жетекчилердин окуянын кокусунан болгонун айтышканын, бирок Украинанын президенти Владимир Зеленскийдин башкача маанидеги билдирүүлөрдү жасаганын белгилеп, буларды кошумчалады: «Украинанын бул окуянын кокустук экенин далилдей турган кадам таштап же таштабай турганын көрүү үчүн күтүп жатабыз. Бул сыяктуу окуялардын кайталанбашы үчүн керектүү чараларды көрөбүз».