Түркиянын президенти Режеп Таййип Эрдоган Ислам Кызматташтык Уюмуна (ИКУ) мүчө өлкөлөрдүн арасында транспорттук интеграцияны күчөтүүгө чакырып, натыйжалуу жана ишенимдүү тармактардын ислам дүйнөсүнүн экономикалык мүмкүнчүлүктөрүн ачууда негизги ролду ойной турганын билдирди.
Эрдоган бейшемби күнү Стамбулда өткөн ИКУнун транспорт министрлеринин жыйынына жөнөткөн видео кайрылуусунда мусулман өлкөлөрү Азиядан Африкага, Европадан Жакынкы Чыгышка чейин созулган кеңири географияга таралганын, табигый коридорлорго, динамикалуу жаш калкка жана тез өсүп жаткан базарларга ээ экенин белгиледи.
«Бирок бул зор потенциалды толук ишке ашыруу жана географиялык артыкчылыктарды стратегиялык күчкө айландыруу үчүн бизге натыйжалуу, ишенимдүү жана интеграцияланган транспорттук тармактар керек», — деген Эрдоган, автожолдор, темир жолдор, порттор жана аэропорттордун ортосундагы байланыштардын чыңдалышы сооданы гана эмес, мүчө мамлекеттердин ортосундагы социалдык жана маданий байланыштарды да арттыра турганын баса белгиледи.
Мармарай туннели, Евразия туннели жана ири көпүрөлөр сыяктуу Түркиянын акыркы мезгилдеги чоң инфраструктуралык долбоорлоруна токтолгон президент, өлкөнүн глобалдык соода жолдорун бекемдеп, темир жол, деңиз жана авиация мүмкүнчүлүктөрүн кеңейтип жатканын айтты.
ИКУ мүчөлөрүн байланыштыруу үчүн жол картасы түзүлдү
Президент Түркиянын «Транс-Каспий Чыгыш-Батыш Орто коридору» долбооруна берген колдоосу менен тарыхый Жибек Жолун заманбап көз карашта жандандырып жатканын билдирди.
«Бирок биз бул инвестицияларды улуттук алкак менен гана чектебейбиз. Максатыбыз — Ислам Кызматташтык Уюмунун мүчөлөрү менен интеграцияны күчөтүү, чек ара коридорлорун өнүктүрүү жана биргелешкен долбоорлор менен кошумча нарк түзүү», — деген президент конференция учурундагы конструктивдүү сүйлөшүүлөрдүн маанилүү кадамдарга алып келгенин белгиледи.
Президент: «Мүчө мамлекеттердин ортосундагы транспорттук байланыштарды бекемдей турган, эл аралык аянтчаларда тилектештикти арттыра турган жана Түркиянын (ИКУ) кезектешкен башкаруучулугу астында транспорттук байланыш стратегиялык документин даярдай турган жол картасын түзүү боюнча маанилүү чечимдерди кабыл алдык», — деди.
Эрдоган: «Эч шексиз бул чечимдерди натыйжалуу ишке ашыруу үчүн техникалык жолугушууларды үзгүлтүккө учуратпоо жана мониторинг механизмдерин кылдаттык менен иштетүү маанилүү. Бүгүн биз көрсөткөн эрк буга жол ачат деп ишенебиз», — деп кошумчалады.
