Индиянын Батыш Бенгалия штатында нөшөрлөгөн жамгырдан улам пайда болгон ири жер көчкү жана көпүрөнүн урашынан каза болгондордун саны 24кө жетти.

Батыш Бенгалиянын башкы министри Мамата Банерджи Түндүк Бенгалия жана Түштүк Бенгалиянын бир нече аймактарын күтүүсүз катуу жааган жамгырдан улам суу каптаганын айтты.

X платформасындагы билдирүүсүндө ал Түндүк Бенгалиядагы туристтерге кайрылып, “полиция аларды коопсуз жерге эвакуация кылганга чейин ошол жерде калууну” сунуштады.

Штаттын Даржилинг округунан депутат Ражу Биста да жер көчкүлөр болгон аймакта 24 кишинин каза тапканын билдирди.

Премьер-министр Нарендра Моди жабыркагандарга бардык “мүмкүн болгон жардам көрсөтүлөрүн” айтты.

Моди X платформасында “Даржилингдеги көпүрө кырсыгынан улам адамдардын өмүрү кыйылганына терең кайгырып жатам. Жакындарын жоготкондорго көңүл айтам. Жаракат алгандар тезирээк сакайып кетишсин. Катуу жааган жамгыр жана жер көчкүлөрдөн улам Даржилинг жана анын айланасындагы абал тыкыр көзөмөлдөнүп жатат,” – деп жазды.