Анадолу агенттигинин маалыматына караганда, Түркиянын Тышкы иштер министрлигиндеги булактар бейшемби күнү Стамбулдагы Орусия-Украина тынчтык сүйлөшүүлөрүн кийинкиге жылдыруу же кечеңдетүү сыяктуу пландардын сөз болбогонун, анткени жолугушуунун графиги азырынча тактала электигин кабарлады.
Бул билдирүү, күтүлгөн сүйлөшүүлөрдүн алдында Украинанын президенти Владимир Зеленский Анкарада Түркиянын президенти Режеп Таййип Эрдоган менен жабык эшик артында жолугушуу өткөрүп жаткан учурда айтылды.
Президенттик комплексте өткөн эки тараптуу жолугушуу жана делегациялардын ортосундагы жумушчу сый тамак 2 саат 45 мүнөткө созулду.
Жыйынга улуттук коргоо министри Яшар Гүлер, улуттук чалгындоо уюмунун башчысы Ибрахим Калын жана президенттин тышкы саясат жана коопсуздук боюнча башкы кеңешчиси Акиф Чагатай Кылыч катышты.
Түркиянын Тышкы иштер министрлигинин булактары тынчтык сүйлөшүүлөрүнүн графиги такталгандан кийин коомчулукка жарыяланарын белгилешти.
Зеленский Орусия-Украина тынчтык сүйлөшүүлөрүнүн алдында Эрдоган менен жолугушуу үчүн Анкарага келди. Зеленскийди ташыган учак саат 12.14тө Анкаранын Эсенбога аэропортуна конду.
Зеленскийди аэропорттон Украинанын тышкы иштер министри Андрей Сыбиха жана НАТОнун тышкы иштер министрлеринин Антальядагы жыйынына катышуу үчүн Түркияга келген расмий өкүлдөр тосуп алышты.
Ошол эле күнү Орусиянын РИА Новости маалымат агенттиги, Орусиянын делегациясы Украина менен ыктымалдуу ок атышпоо сүйлөшүүлөрү үчүн Түркияга келгенин кабарлады.
Буга чейин Түркиянын Коммуникация башкармалыгынын башчысы Фахреттин Алтун X социалдык тармагында Эрдоган менен Зеленскийдин Орусия-Украина согушуна байланыштуу акыркы абалды кеңири талкуулай турганын билдирген.
Алтундун айтымында, бул сапар учурунда Эрдоган Түркиянын ок атышууну токтотуу жана тынчтык сүйлөшүүлөрүн баштоо чакырыгын дагы бир жолу баса белгилейт.
