Түркия Республикасынын Президенти Режеп Таййип Эрдоган балдар эч качан согуштун, кагылышуунун жана жакырдыктын жүгүн көтөрбөшү керектигин белгилеп, тынчтык жана коопсуздукта жашоо алардын эң табигый укугу экенин айтты.
Эрдоган бейшемби күнү Анкарада өткөн 48-Эл аралык 23-апрель Балдар майрамынын гала-программасында сүйлөгөн сөзүндө аймакта тынчтыкты калыбына келтирүү аракеттерин жүргүзүп жаткан учурда согуштардан жана кысымдардан эң көп бейкүнөө балдардын жабыркап жатканын билдирди.
Иш-чарада балдарга кайрылган Эрдоган: «Согуш, кагылышуу, жокчулук, жакырчылык болбогон өлкөдө жана дүйнөдө жашоо - силердин эң табигый укугуңар", - деди
Ал бардык дипломатиялык аракеттерге карабастан, зордук-зомбулук жана адилетсиздик аймакты бүлүндүрүүнү улантып жатканын эскертти.
“Тилекке каршы бардык аракеттерибизге карабастан аймагыбыздагы согуштар менен зулумдук уланууда. Бул согуштардын оор жүгүн көбүнчө балдар көтөрүп жатат”,- деди.
'Балдар коркпой чоңоё турган келечек'
Президент Режеп Таййип Эрдоган Түркия кагылышууларды токтотуу жана балдардын туруксуздук менен зомбулуктун курмандыгы болушуна жол бербөө үчүн аракет кылып жатканын айтты.
“Кагылышууларды токтотууга жана балдардын көз жашын агызбоого аракет кылып жатабыз. Бир гана максатыбыз — дүйнөдөгү бардык балдар тынчтыкта, коопсуздукта жана бир туугандык ичинде жашашы,” - деди.
Президент Түркиянын артыкчылыктуу багыты балдар коркпостон чоңоюп, коопсуздукка, кадыр-баркка жана үмүткө жете ала турган келечекти курууга салым кошуу экенин белгиледи.
Эрдоган бул сөздөрдү Түркиянын балдарга жана келечек муундарга арналган эң маанилүү улуттук майрамдарынын бири болгон 23-апрель Улуттук эгемендик жана балдар күнүн белгилөөнүн алкагында айтты.
