Италия өкмөтү бейшемби күнү Израилдин аскердик соккусунан аман калган, бирок тогуз бир тууганын жоготкон палестиналык баланы дарылоону сунуштады. Бул чечим баланын агасынын кайрылуусунан кийин кабыл алынды.

Италиянын Тышкы иштер министрлиги: “Италия өкмөтү оор жаракат алган баланы Италияга которууга даяр экенин билдирди,” деп кабарлады. Ошондой эле операциянын мүмкүнчүлүктөрү каралып жатканын кошумчалады.

Газанын түштүгүндө кызмат көрсөткөн саналуу саламаттык сактоо мекемелеринин бири болгон Насер ооруканасында дарыланып жаткан Адем ан-Наджар 25-майда үйүнө жасалган кол салууда тогуз бир тууганынан ажырагандан кийин абалы оор.

Адемдин ата-энеси экөө тең дарыгер. Анын атасы Хамди ан-Наджар балдары менен үйдө болгон жана ал да оор жаракат алган. Учурда жубайы Ала иштеген ооруканада уулу менен дарыланууда.

Адемдин агасы Али ан-Наджар Италиянын “la Repubblica” гезитине берген маегинде, 11 жаштагы баланын денеси күйүп, башынан жаракат алганын, сол колу сынганын жана баса албай калганын айтты. Ошондой эле Насер ооруканасы аны дарылоого жетиштүү жабдылган эмес экенин баса белгиледи.

"Аны дароо Газанын сыртындагы чыныгы ооруканага алып барыш керек. Италия өкмөтүнөн бир нерсе кылуусун суранам, аны алып кеткиле, италиялыктар аны сактап калсын" деди.