Пекин Вашингтондун Арктика аймагындагы "өзүмчүл" кызыкчылыктары үчүн Кытай менен Орусияны "шылтоо" катары көрсөткөн АКШнын президенти Дональд Трампка реакция кылды. Пекиндин бул билдирүүлөрү менен Гренландияны айтып жатканы болжолдонууда.

Кытайдын Тышкы иштер министрлигинин өкүлү Мао Нин дүйшөмбү күнү: "Арктика аймагы эл аралык коомчулуктун жалпы кызыкчылыгын көздөйт. Кытайдын Арктикадагы ишмердүүлүгү тынчтыкка жана туруктуулукка, туруктуу өнүгүүгө жана эл аралык укукка салым кошот. Биз АКШнын Кытайды же Орусияны шылтоо катары колдонуу менен өзүмчүл пайда табууга умтулушун жактырбайбыз. Аймакта иштөөгө укугу жана эркиндиги бар бардык өлкөлөр толук урматталышы керек", - деди.

Пекиндин бул сөздөрү Трамп жекшемби күнү Гренландияны алуу АКШ үчүн Данияга таандык стратегиялык Арктика аймагын Орусия же Кытайдын көзөмөлүнө өтүшүнө жол бербөө максатында зарыл экенин жактагандан кийин айтылды.

Трамп Флоридадан Вашингтонго бара жатып журналисттерге: "Эгерде биз Гренландияны албасак, Орусия же Кытай аны алат, мен мунун болушуна жол бербейм... бирок биз кандайдыр бир жол менен Гренландияны алабыз", - деп айткан.

Анадолу агенттигинин Трамптын башка өлкөнүн эгемендүү аймагын басып алуу аракети тууралуу суроосуна Мао: "Мамлекеттер аралык мамилелер БУУнун Уставынын принциптерине ылайык жүргүзүлүшү керек", - деп жооп берди.