БУУнун Палестиналык качкындарга жардам агенттиги (UNRWA) бейшемби күнү, Газа тилкесинде 650000ден ашуун бала үч жылдан бери билим ала албай жатканын билдирди.
UNRWA X платформасындагы бөлүшүүсүндө “Газада балдар үч жыл катары менен мектепке бара албай жатышат. Болжол менен 660000ге жакын кыздар жана балдар үчүн билим алуу жөн гана окуу эмес, терең травмадан айыгууну да билдирет” деп жазды.
UNRWA Газадагы эң ири гуманитардык уюм катары бул балдарды колдоого даяр экенин кошумчалады.
UNRWAнын тышкы байланыштар боюнча директору Тамара Альрифаи: “UNRWA үчүн эң башкы приоритет – балдардын билим алуусу жана окуу процессин калыбына келтирүү,” – деди.
2023-жылдын октябрынан бери Израилдин чабуулдарынын натыйжасында 68,000ге жакын палестиналык, алардын көбү аялдар жана балдар каза болуп, Газа тилкеси жашоого жараксыз абалга келди.
Гуманитардык иштерди координациялоо кеңсесинин (OCHA) маалыматына караганда, бул кол салуулар Газадагы мектеп имараттарынын 97 пайызын толугу менен же жарым-жартылай жок кылды.
Өткөн жумада Израиль менен ХАМАСтын ортосунда АКШ президенти Дональд Трамп сунуштаган пландын негизинде ок атышууну токтотуу келишими түзүлдү. Биринчи этапта израилдик туткундарды палестиналык туткундарга алмаштыруу каралган. Ошондой эле план Газаны кайра курууну жана ХАМАСсыз жаңы башкаруу механизмин түзүүнү көздөйт.
