Сирия жаңы жылдык майрамда Халеп шаарынын түндүгүндөгү жарандык чогулуштарды жана чиркөөлөрдү бутага алган ДЕАШтын "террордук планына" тоскоол болгонун жарыялады.

Бейшемби күнү ички иштер министрлигинен берилген маалыматта, ДЕАШтын Халеп жана башка бир нече провинцияда жаңы жылдык майрамда жан кечтилик кол салууну пландаганы боюнча кабар алынгандыгы билдирилди.

Министрлик маалыматтын терроризмге каршы үзгүлтүксүз аракеттер, ДЕАШтын уяларын тыкыр көзөмөлдөө жана терроризмге каршы операцияларда орун алган өнөктөш мекемелер менен чалгын кызматтарынын кызматташтыгынын натыйжасында алынгандыгын кошумчалады.

Министрликтин маалыматы боюнча, шаршемби күнү кечинде Халебдин Баб эль-Фараж аймагындагы көзөмөлдөө пунктунда нөөмөттө турган кызматкерлер шектүү деп табылган адамды токтотушкан; кийинчерээк ал адамдын ДЕАШтын мүчөсү экендиги аныкталды.

Маалыматта айтылгандай, кызматкерлер анын ким экенин аныктоого аракет кылып жатканда, шектүү ок чыгарып, бир полиция кызматкерин өлтүргөн; андан кийин жардыргыч затты жардырып, аны камакка алууга аракет кылган эки полиция кызматкерин жарадар кылган.

Министрлик кызматкерлеринин аракеттери жаңы жылдык майрамдарда жарандарды бутага алууну көздөгөн олуттуу террордук планды алдын алууда чечүүчү ролду ойногонун билдирди.

Сирия 12-ноябрда АКШ жетектеген ДЕАШка каршы эл аралык коалицияга расмий түрдө кошулду.

Коалиция 2014-жылы түзүлгөн жана Сирия менен Иракта террордук уюмга каршы аскердик операцияларды жүргүзгөн бирок Дамаск буга чейин мүчө болгон эмес.

Жаңы Сирия өкмөтү 2024-жылдын аягында Асад режими кулагандан бери өлкө боюнча коопсуздук шарттарын күчөтүүгө аракет кылууда.