Жээктери, көөнөрбөс археологиялык казыналары жана Европа менен Азиянын кесилишиндеги уникалдуу маданий мозаикасы Түркиянын туризм тармагын рекорддук деңгээлге көтөрдү.
Дүйнөлүк саякат жана туризм кеңешинин (WTTC) маалыматына караганда, сектордун быйыл өлкө экономикасына болжол менен 5,2 триллион түрк лирасы салымын кошушу күтүлүүдө, бул да ИДПнын болжол менен 12 пайызына барабар.
WTTCнын жаңы отчетунда сектордун өткөн жылдын деңгээлинен 5,2 миллиард доллардан ашык өсөрү болжолдонууда. WTTCнын башкы директору Жулия Симпсон Түркиянын туризмди өнүктүрүүдөгү стратегиялык мамилесин жогору баалады.
Симпсон Анадолу агенттигине берген маегинде: “Түркиянын көз карашы туризмдин өсүшүнө чоң түрткү болду жана Түркия өзүн туристтик багыт катары таанытууда маанилүү кадамдарды жасады. Turkish Airlines дүйнөнүн көптөгөн жерлерине учкан авиакомпания болуп саналат, бул да Түркиянын абдан жакшы байланышта экенин билдирет. Байланыштуулук абдан маанилүү,” — деди.
“Ошондой эле бул жер коопсуз өлкө; саякатчылар өздөрүн коопсуз сезиши керек жана Түркия барууга ылайыктуу коопсуз өлкө,” — деп кошумчалады Симпсон.
“Андан тышкары табигый кооздугу бар — Түркия абдан кооз жер. Айрыкча Антальянын жээктери өзгөчө керемет. Ошондой эле тарыхый жана байыркы экспонаттары укмуштуудай. Бул чындап эле Батыш менен Чыгыштын кесилишкен жери”.
WTTC изилдөөсү жергиликтүү жана чет элдик туристтер бул өсүшкө чоң салым кошот деп болжолдойт. Чет элдик туристтердин сарптоолору 2025-жылы 67,7 миллиард долларга жетери күтүлүүдө, бул да Түркиянын дүйнөлүк аренадагы популярдуулугунун өсүп жатканын чагылдырат.
Бир тараптан ички туристтердин сарптоолору 36,5 миллиард долларга жетет деп күтүлүүдө, бул да өлкөнүн ички туризм рыногунун жандуулугун көрсөтөт. Отчетто ошондой эле саякат жана туризм секторунун быйыл Түркиянын жалпысында 3,3 миллион кишини жумуш менен камсыздай турганы, бул жалпы жумуштуулуктун 10 пайыздан ашыгын түзөрү болжолдонууда.
