Израилдин аскердик башкы прокурору кызматтан кетти. Ал белгилүү аскердик камак жайында палестиналык туткунду ур-токмокко алган аскерлердин видеосун ачыкка чыгарганын мойнуна алды. Бул тууралуу Израилдин маалымат каражаттары анын катынан үзүндү келтирип жазышты.
Бул окуя Израилдин саясий чөйрөсүндө чоң талаш-тартыш жаратты. Аскердик прокурор, генерал-майор Ифат Томер-Йерушалми, оңчул саясатчылардын катуу сынына кабылды. Алар анын бул кадамын мамлекетке чыккынчылык экендигин жакташууда.
Томер-Йерушалми эл аралык коомчулук тарабынан Израилдин аскерлеринин согуштук кылмыштарына карата өтө жумшак мамиле кылуу менен сынга алынган. Бирок Израилдин ашынган оңчул саясий климаты жана Нетаньяхунун саясатынан улам аракеттенүүгө мүмкүнчүлүк табууда кыйналып жаткан.
Өткөн жылы Израилдин 12-каналынан чыккан видеодо израилдик жоокерлердин Израилдин түштүгүндөгү Сде Тейман кармоочу жайында Газадан келген палестиналык туткунга сексуалдык зомбулук көрсөтүп жатканы көрсөтүлгөн.
Армиянын окуя боюнча аскердик иликтөө баштаганы да ашынган улутчулдарды кыжырлантты жана бир топ адам нааразычылык иретинде мекемени басып кирген.
Жума күнү отставкага кетүү арызында Томер-Йерушалми видеону армия палестиналык камактагылардын укуктарын израилдик аскерлердикинен жогору коёт деген сынга каршы туруу үчүн атайын чыгарганын белгиледи.
Израилдин коргоо министри Исраэль Кац жана көптөгөн израилдик саясатчылар Томер-Йерушалми кызматтан кеткенден кийин аны катуу сынга алышты. Кац анын кайрадан кызматка дайындалбай турганын жана видеону жарыялоо чечимин кабыл алгандар боюнча тергөө иштеринин уланарын билдирди.
Израилдин Газадагы согушунда, айрыкча окуя болгон Сде Тейман мекемесинде палестиналык туткундарга жасалган мамиле адам укуктарын коргоочу топтор тарабынан кыянаттык катары айыпталууда. Туткундар массалык түрдө кармалып, айыпсыз жана сотсуз айлар бою камакта кармалышкан. Эркиндикке чыккан туткундар түрмөдө ур-токмокко алынганын, тамак-аштын жетишсиздиги жана шарттардын оордугун билдиришти.
