SAHA 2026 эл аралык коргонуу, авиация жана космос өнөр жайы жарманкеси бүгүн ачылып, 9-майга чейин Стамбул көргөзмө борборунда конокторду тосуп алат.

Өнөр жай жана технология министри Мехмет Фатих Кажыр көргөзмөнүн ачылышында сүйлөгөн сөзүндө глобалдык коргонуу чыгымдары акыркы 10 жылда 41 пайызга өсүп, 2025-жылы 2,9 триллион долларга жеткенине токтолду. «Тынымсыз уланып жаткан геосаясий чыңалуу бул өсүү тенденциясы дагы да уланарынан кабар берет», — деп кошумчалады министр.

Түркия акыркы 23 жыл ичинде коргонуу муктаждыктарын камсыздоодо ата мекендик продукциянын үлүшүн 20 пайыздан 80 пайызга чейин көтөргөнүн белгилеген Кажыр, учурда дүйнө жүзү боюнча сатылган ар бир үч аскердик учкучсуз учуучу аппараттын экөөсү түрк компаниялары тарабынан чыгарылып жатканын билдирди. Ошондой эле ал Түркия өзүнүн аскердик кемелерин долбоорлоп, иштеп чыгып жана өндүргөн дүйнөдөгү 10 өлкөнүн бири экенин баса белгиледи.

"Коргонуу өнөр жай ишканаларыбыз жыл сайын жаңы жөндөмдөргө ээ болууда"

Министр Мехмет Фатих Кажыр Түркиянын коргонуу тармагындагы ийгиликтерине токтолуп, өлкөнүн бешинчи муундагы «KAAN» истребители, «Bayraktar TB3», «GÖKDOĞAN» жана «BOZDOĞAN» ракеталары, «Bayraktar KIZILELMA» учкучсуз истребители, «ALTAY» танкы, «HÜRJET» учагы жана абадан коргонуучу «Болот кумбез» (Çelik Kubbe) системасы сыяктуу заманбап куралдары бар экенин айтты.

«2002-жылы 248 миллион доллар болгон коргонуу экспортубуз активдүү дипломатиябыз жана компанияларыбыздын глобалдык рынокко багыт алышынын натыйжасында өткөн жылы 10 миллиард доллардан ашты. Учурда коргонуу экспорту боюнча дүйнөдө 11-орунда турабыз. Бул көрсөткүч дагы өсөт деп ишенебиз, себеби биздин ишканалар жыл сайын жаңы технологияларды өздөштүрүп, өндүрүш кубатын туруктуу арттырууда», — деди Кажыр.

Ошондой эле ал коргонуу продукциялары боюнча 80 пайыз сырткы булактарга көз каранды болгон жана коопсуздук коркунучтарынан улам коргонуу потенциалын бекемдөөгө аракет кылып жаткан Европа үчүн Түркия эң маанилүү өнөктөш экенин баса белгиледи. Министрдин айтымында, түрк коргонуу өнөр жайы согуш талаасында натыйжалуулугу далилденген, жогорку технологиялуу жана үнөмдүү продукциялары менен Европанын коопсуздук системасынын муктаждыктарын толук камсыз кыла алат.