Түркия өз аба мейкиндигин коргоо үчүн Patriot системасын даярдап жатат
Түркиянын Коргоо министрлиги, АКШ менен Израиль Иранга каршы согуш жүргүзүп жаткан учурда Түркиянын Куралдуу күчтөрү абадан жана ракетадан коргонууну бекемдөө үчүн НАТО менен биргеликте иш-аракет кылып жатканын билдирди.
Түркия аймактык чыңалуулар уланып жаткан учурда өлкөнүн аба мейкиндигин коргоого жардам берүү максатында жана НАТО менен координацияланган иш-аракеттердин алкагында Түркиянын чыгышында операциялык жактан даяр туруусу үчүн Patriot абадан коргонуу системасын жайгаштырганын кабарлады.
Улуттук коргонуу министрлиги шейшемби күнү, Түркиянын Куралдуу күчтөрү акыркы аймактык окуяларга карабастан "өлкөбүздүн жана жарандарыбыздын коопсуздугун камсыз кылууга толук берилгендигин" билдирди.
Министрлик: "Аймагыбыздагы акыркы окуяларды эске алуу менен, чек араларыбыздын жана аба мейкиндигибиздин коопсуздугун камсыз кылуу үчүн зарыл чаралар көрүлүп жатат, ошондой эле НАТО жана союздаштарыбыз менен кеңешүүлөр жүргүзүлүүдө", - деди.
Билдирүүдө улуттук деңгээлдеги чаралардан тышкары, альянстын аймактык коргонуу позициясын бекемдеп жатканы да маалымдалды.
Билдирүүдө: "Улуттук деңгээлде көргөн чаралардан тышкары, НАТО абадан жана ракетадан коргонуу чараларын күчөттү", - деп айтылды.
Министрлик: "Ушул алкакта өз аба мейкиндигибизди коргоону колдоо үчүн дайындалган Патриот системасы Малатияга жайгаштырылды", - деп кабарлады.
Малатияда 2012-жылы НАТО тарабынан баллистикалык ракеталарды аныктоо үчүн орнотулган эрте эскертүүчү радар станциясы жайгашкан.
Дүйшөмбү күнү Ирандан учурулуп, Түркияга карай илгерилеген дагы бир ракетага НАТОнун абадан коргонуу системалары тарабынан бөгөт коюлган. Бул акыркы жумада Ирандын ракеталарынын Түркиянын аба мейкиндигине кирүүсүнүн экинчи окуясы болду.
Анкара өзүнүн коопсуздугун эң жогорку деңгээлде камсыздайт
Министрлик Түркия коргонуу жана коопсуздук маселелери темасында НАТО альянсы менен биргеликте иш-аракет кылууну уланта берерин билдирди.
Билдирүүдө: "Коргонуу жана коопсуздук мүмкүнчүлүктөрүн эң жогорку деңгээлде сактаган өлкөбүз НАТО жана союздаштарыбыз менен кызматташып кеңешүүлөрдү жүргүзүү аркылуу жагдайды карап чыгууну, аймактык тынчтыкка жана туруктуулукка умтулууну улантат", - деп айтылды.
Бул билдирүү АКШнын жана Израилдин Иранга кол салууларынан улам аймактык чыңалуу күчөгөн учурда жарыяланды.
Израиль менен АКШ 28-февралда Иранга биргелешкен чабуулдарды баштагандан бери чыңалуу күчөдү, анын натыйжасында Жогорку лидер Али Хаменеи баштаган 1300гө жакын адам каза болду.
Иран болсо Израилге, Иорданияга, Иракка жана АКШнын аскердик күчтөрү жайгашкан бир нече Перс булуңу мамлекеттерине каршы дрон жана ракеталык соккулар менен жооп кайтарды.
Иран ошондой эле 1-мартта Ормуз кысыгын жаап салганын кабарлады.
Бул стратегиялык суу жолу аркылуу адатта күнүнө болжол менен 20 миллион баррель мунай жана дүйнөлүк суюлтулган жаратылыш газынын 20 пайызы ташылат.