Түркиянын Жер Ортолук деңиздин жээгинде жайгашкан Антальядагы Аспендос байыркы шаарында театрга жана акрополго алып баруучу 2000 жылдык байыркы жол табылды.

Памфилия жээк аймагынын эң негизги байыркы шаарларынын бири болгон Аспендостогу казуу иштери Афйон Кожатепе университетинин Археология бөлүмүнүн башчысы Мустафа Билгиндин жетекчилиги астында 2022-жылдан бери жүргүзүлүүдө. Тарыхый изилдөөлөр Түркиянын Маданият жана туризм министрлигинин «Келечекке мурас» долбоорунун алкагында жаңы күчкө ээ болду.

Казууларда театр менен акрополду бириктирген байыркы жолдун болжол менен 300 метрлик бөлүгү, жакшы сакталган набайкана, коомдук имараттар, турак үйлөр, монументалдуу дарбаза жана өнүккөн инфраструктура системалары сыяктуу маанилүү табылгалар чыгарылды.

Билгин Анадолу агенттигине берген маегинде театры жана акведуктары менен көптөн бери белгилүү болгон байыркы шаардын эми конокторго акрополдо жайгашкан монументалдык курулуштары менен жаңы тажрыйба сунуштай турганын билдирди.

Билгин эки жылдык казуу иштеринен кийин Театр көчөсүндөгү иштердин аяктап баратканын айтып: "Конокторубуз эми театрдан байыркы жол менен акрополго чыга алышат. Бул байыркы мезгилдердеги Аспендостун эң көп колдонулган шаардык транспорттук негизги жолдорунун бири болгон. Биз көбүнчө коомдук имараттарды, жеке турак жайларды жана көчөнүн боюндагы монументалдык дарбазаны ортого чыгардык",- деди.

Финикия монеталары жана айнек атыр бөтөлкөлөрү табылды

Билгин ошондой эле казуу иштери учурунда Аспендостун соода турмушу жөнүндө маанилүү табылгаларды табышкандарын айтып, эки кабаттуу дүкөндөрдөн жана стоа комплексинен аймакка гана тиешелүү финикия тыйындары жана айнек атыр бөтөлкөлөрүнүн табылганын билдирди.

Бул табылгалар Аспендостун Сирия жана Палестина сыяктуу Чыгыш Жер Ортолук деңиз аймактары менен болгон соода байланыштарын көрсөтөрүн баса белгилеген Билгин, табылган набайкана болсо байыркы доордогу күнүмдүк турмуш жана архитектура тууралуу маанилүү маалыматтарды берерин кошумчалады.