Министрдин орун басары Асад режими кулатылгандан кийин Сириядагы саясий окуялардын жана эки тараптуу мамилелердин жакшырышынын негизинде Түркиянын Сирияга экспорту 2025-жылы 3 миллиард доллардан ашып жылдык 54,1 пайызга өскөнүн айтты.
Анадолу агенттигине берген билдирүүсүндө Өзгүр Волкан Агар Түркиянын Сирияга экспорту өткөн жылы 1,95 миллиард долларды түзгөнүн, коңшу өлкөгө жеткирүүлөрдө кескин өсүү болгонун баса белгиледи.
Агар Түркиянын жалпы товар экспорту январь-ноябрь айларында 270,6 миллиард долларга жеткенин жана жылдын акыркы көрсөткүчтөрү 2026-жылдын январь айында өтө турган экспортту баалоо аземинде жарыяланаарын кошумчалады.
Министрдин орун басары аземге келерки жылдын экспорттук максаттарын жарыялай турган Түркиянын президенти Режеп Таййип Эрдогандын да катышаарын билдирди.
Кызмат көрсөтүү тармагында да Түркия тышкы соода профицитине ээ өлкө экенине көңүл бурган Агар январь-ноябрь айларында жылдык эсеп менен 122,5 миллиард долларлык кызмат көрсөтүү экспортуна жетишкенин маалымдады. Ноябрь айында товарлардын жана кызмат көрсөтүүлөрдүн жалпы экспорту 393,1 миллиард долларга жетти.
Агар: "Биздин максатыбыз 2026-жылы бул көрсөткүчтөрдөн бир топ жогорулоо", - деди.
Түркия коңшу өлкөлөргө экспортто маанилүү ролду ойной берерин айткан Агар өткөн жылдын декабрында Асад режими кулатылгандан бери Сирия менен соода кеңейгенин кабарлады.
Министрдин орун басары: «Сирияга экспортубуз 3 миллиард доллардан ашты. Өткөн жылдарга салыштырмалуу 54 пайыздык өсүшкө жетиштик. Бул мурунку жылдарга салыштырмалуу абдан олуттуу өсүш. Ошондуктан Сирия өнүгүп саясий туруктуулугун бекемдеген сайын, Түркия менен мамилелерин дагы да өнүктүрөт жана алда канча жакшы тышкы соода көрсөткүчтөрүнө жетишебиз», - деп билдирди.
