Бириккен Улуттар Уюмунун азык-түлүк жардамы боюнча агенттиги шаршемби күнкү билдирүүсүндө, негизги донорлордон каржылоонун кескин кыскарышы анын алты өлкөдөгү ишмердүүлүгүнө терс таасирин тийгизгенин жана 14 миллионго жакын адам ачарчылыкка кабылышы мүмкүн экенин эскертти.
БУУнун эң көп каржыланган агенттиги болгон Дүйнөлүк азык-түлүк программасы (WFP) жаңы отчетунда быйылкы каржылоо “эч качан мынчалык оор болгон эмес” деп белгиледи. Бул негизинен Трамп администрациясы учурунда АКШ жана башка алдыңкы Батыш донорлорунун каржылоону кыскартуулары менен байланыштуу.
Агенттик жардам алган 13,7 миллион кишинин каражаттын кыскарышынан улам ачарчылыкка кабылышы мүмкүн экенин эскертти. "Чоң үзгүлтүккө учураган" өлкөлөргө Ооганстан, Конго Демократиялык Республикасы, Гаити, Сомали, Түштүк Судан жана Судан кирет.
Аткаруучу директор Синди Маккейн: "Биз миллиондогон адамдардын өмүрүн сактап калуучу жардамдын көз алдыбызда жок болуп жатканын көрүп жатабыз. Бул жөн гана каржылык ажырым эмес; биз эмне кылышыбыз керек жана эмне кыла ала турганыбыздын ортосундагы реалдуу ажырым. Ачарчылыкка каршы күрөштөгү ондогон жылдар бою жетишилген прогрессти жоготуу коркунучунда турабыз", - деди.
Римде жайгашкан агенттик, дүйнөлүк ачарчылык ансыз деле рекорддук деңгээлде экенин жана 319 миллион адам курч азык-түлүк коопсуздугуна туш болуп жатканын, анын ичинде 44 миллиону өзгөчө деңгээлде экенин билдирди. Газа тилкесинде жана Суданда ачарчылык болуп жатканы да айтылды.
Афганистанда азык-түлүк жардамдары азык-түлүк коопсуздугууна дуушар болгон адамдардын 10 пайызынан азыраагына жетип жатат, башкача айтканда алар кийинки тамактары кайдан келерин билишпейт.
WFP быйыл АКШдан болжол менен 1,5 миллиард доллар алууну күтүп жатканын, бул өткөн жылдагы 4,5 миллиард долларга жакын көрсөткүчтөн кыйла төмөн экенин айтты. Ошондой эле башка негизги донорлордун да каржылоону кыскартканын кабарлады.
Бириккен Улуттар Уюмунун миграция, саламаттыкты сактоо жана качкындар агенттиктери сыяктуу көптөгөн уюмдары быйыл ири донорлордон колдоонун азайышынан улам жардам жана кызматкерлердин санынын олуттуу кыскарганын жарыялашты.
