Орусиянын Коргоо министрлиги Украинанын чыгышындагы Донецк облусунда эки жана түндүгүндөгү Сумы облусунда бир отурукташкан жерди басып алганын билдирди.
Ишемби күнкү билдирүүдө аскерлер Донецк облусундагы акыркы убакта Орусиянын кысымына кабылган Константиновка шаарынын чыгышындагы Ступочки кыштагын басып алганы айтылат.
Ошондой эле 1000 километрге созулган фронт сызыгынын батыш тарабында жайгашкан Отрадне айылы менен Сумы аймагындагы Орусиянын чек араларында жайгашкан Локня айылы да көзөмөлгө алынганы жарыяланды.
Украинанын башкы штабы бул жоготууларды моюнга алган жок жана Отраднени украин аскерлери Орусиянын чабуулун токтоткон фронттогу саналуу кыштактардын бири катары мүнөздөдү. Башкы штаб ошондой эле Ступочки ушул аптанын башында орусиялык чабуулга кабылган аймак катары аныкталганын белгиледи.
Украина бир нече айдан бери орус күчтөрүнүн Сумы аймагындагы жерлерди басып алуу аракетин айтып келет, бирок ал аймактардын бири да басып алынганын моюнга алган жок.
Орусиянын Коргоо министрлиги жума күнү түндүк-чыгыштагы Купянск шаарынын четиндеги Радкивка айылы алынганын жарыялады.
Дрон чабуулдары
Ошол эле учурда Орусиянын Коргоо министрлиги абадан коргонуу бөлүктөрү 4 сааттын ичинде негизинен борбордук жана түштүк аймактар менен Москванын айланасында 95 украиналык дронго бөгөт коюп, жок кылганын жарыялады.
Москванын мэри Сергей Собянин Telegram баракчасына борборду көздөй багыт алган алты дрон жок кылынганын жазды.
Ал арада Киев ондон ашык орусиялык дрондордун чабуулуна кабылганын кабарлады. Киев шаардык аскер администрациясынын башчысы Тимур Ткаченко жекшемби күнү эртең менен борбор калаанын айланасындагы аба мейкиндигинде «душмандын ондон ашык дрондору» табылганын билдирди.
«Жаңы дрондор да жакындап келе жатат. Киевдеги жана анын айланасындагы кээ бир дрондор жок кылынды. Бирок жаңылары дагы эле борборго кирип жатат», - деп жазды Ткаченко Telegram баракчасына.
«Түн оңой болбойт. Душман стратегиялык учактардан көп сандаган дрондорду жана ракеталарды учурат деген коркунуч бар»,-деди ал.
Ткаченко кулап түшкөн дрондордун биринин калдыктары беш кабаттуу турак жайдын үстүнө түшкөнүн кошумчалады.
Киевдин мэри Виталий Кличко шаар «чабуул алдында», бирок «абадан коргонуу системалары иштеп жатканын» айтып, жарандарды «баш калкалоочу жайларда болгула!» деген чакырык салды.
Түнкү тынымсыз кол салуулар Орусия менен Украина согуш башталгандан берки эң ири туткун алмашууну ишке ашырып жаткан учурга туш келди.
