Россиянын президенти Владимир Путин АКШнын президенти Дональд Трампка Украинага алыс аралыкка учуучу Tomahawk ракеталарын берүү Москванын - Вашингтон карым - катнаштарына зыян келтирерин айтты.
Президенттин жардамчысы Юрий Ушаков бейшемби күнү Москвада өткөн пресс - жыйынында: “Путин Tomahawk ракеталарынын согуш аянтындагы абалды өзгөртпөй турганын, бирок өлкөлөрүбүздүн арасындагы карым - катнаштарга жана Украинада тынчтыкчыл чечүүчү жол ыктымалдарына олуттуу зыян келтирерин кайталады”,- деди.
Ушаков эки лидердин ортосундагы болжол менен эки жарым саатка созулган телефон сүйлөшүүсүнүн “ар тараптуу, ошол эле учурда жылуу жана сырдуу болгонун" белгиледи.
Путин Украинадагы согушка өзгөчө басым жасап Трампка "учурдагы кырдаалга байланыштуу кенен баа берүүнү"сунуштаганын билдирди.
Кремлдин расмий өкүлүнүн айтымында, Москва Вашингтонго орус күчтөрү фронтто «толук стратегиялык демилгеге» ээ экенин билдирген, ал эми Трамп кагылышууда «ылдам түрдө тынчтыкка жетишүүнүн» зарылдыгын бир нече жолу баса белгиледи.
Эки лидердин дагы бир бетме-бет сүйлөшүү мүмкүнчүлүгүн талкуулашкандарын жана эки тараптын расмий өкүлдөрү саммитке дароо даярдык көрүү боюнча макулдашкандарын белгиледи; жолугушуу жери катары Будапешттин алдыга чыкканын айтты.
Путин менен Трамп акыркы жолу август айында Аляскада өткөн саммитте жолугушкан бирок андан бери тынчтык сүйлөшүүлөрүндө эч кандай жылыш болгон жок.
Трамп бул процессте НАТО союздаштары менен координацияны жана Москвага карата кысымды күчөтүүгө аракет кылды. Буга орус мунайын сатып алууну токтотуу чакырыгы да кирет.
Бейшемби күнкү жолугушуудан кийин Трамп "Truth Social" сайтына Путин менен Венгрияда "согушту токтотуунун жолдорун талкуулоону" пландап жатканын жана эки тараптын жогорку деңгээлдеги делегациялары келерки аптада жолугушаарын жазды.
Жолугушуу Трамптын жума күнү Ак үйдө Украинанын президенти Владимир Зеленский менен өткөрө турган жыйындан мурун болду. Негизги күн тартибинде абадан коргонуу жана алыс аралыкка атуучу курал системаларынын орун алышы күтүлүүдө.
Трамп бул айдын баштарында Зеленскийдин сентябрь айында билдирген талаптарынын негизинде Tomahawk ракеталарын Киевге өткөрүп берүүнү же бербөө тууралуу чечим чыгаруу этебына келгенин айткан.
