Кремль Россияга карата АКШнын санкцияларын жеңилдетүү жана туткундарды бошотуу боюнча Москва менен Вашингтондун сүйлөшүүлөрү тууралуу дооматтарды четке какты.
Кремлдин басма сөз катчысы Дмитрий Песков шаршемби күнү The Atlantic журналынын АКШ президенти Дональд Трамптын айрым туткундарды бошотуунун ордуна айрым санкцияларды жеңилдетүү демилгесин колдогону тууралуу кабарына баа берди.
Песков Москвада өткөргөн пресс - жыйынында : “Бул тема тууралуу сүйлөшүү болгон жок жана мындай формада каралышы мүмкүн эмес, анткени биз кандайдыр бир саясий туткундардын бар экенин чечкиндүү түрдө четке кагабыз жана маселенин ушундай нукта каралышын туура эмес деп эсептейбиз", — деди.
Буга чейин ишке ашырылган туткун алмашууларга токтолгон Песков эки өлкөнүн чалгындоо кызматтарынын бул темада сүйлөшүүлөрдү улантып жатканын айтты.
Калининград
Песков Москванын Польшанын жана башка Европа өлкөлөрүнүн Россиянын Калининград облусун блокадага алуу мүмкүнчүлүгү боюнча билдирүүлөрүн эске алганын билдирди.
Песков: "Польшадан жана башка Европа өлкөлөрүнөн Калининград маселеси да көтөрүлгөн, өтө ченемсиз билдирүүлөрдү бир нече жолу уктук,- деди.
Песков орус дипломаттары бул маселе боюнча европалык жетекчилердин көңүлүн Москванын саясий документтерине бурганын белгилеп: «Дипломаттарыбыздын Европадагы айрым саясатчыларга бул боюнча саясий документтерибизди эскерткени толугу менен мыйзам ченемдүү көрүнүш», — деди.
Калининград - Балтика деңизинин жээгинде, Польша менен Литванын ортосунда жайгашкан Россияга таандык анклав.
Шейшемби күнү Лондондогу Россиянын элчилиги британ басма сөзүндө НАТО Калининградды блокадалоону же Россиянын аймактагы эгемендүүлүгүнө шек келтирүүнү карап жатканы тууралуу маалыматтарга жооп берди.
Элчилик Москванын мындай аракеттерге ядролук курал да болгон «колундагы бардык мүмкүнчүлүктөрдү колдонуу менен» жооп берерин эскертти.
Казакстан менен карым - катнаштар
Песков ошондой эле Казакстандын президенти Касым-Жомарт Токаевдин Россиянын президенти Владимир Путин жана эки өлкөнүн ортосундагы карым - катнаштар боюнча акыркы билдирүүлөрүн ыраазычылык менен кабыл алды.
Песков: «Казакстандын президентинин мамлекет башчысы Путин тууралуу берген баасын жогору баалайбыз жана ага ыраазычылык билдиребиз», — деди.
The Times of Central Asia гезитинин маалыматы боюнча, Токаев шейшемби күнү Германиянын канцлери Фридрих Мерц менен болгон пресс- жыйынында Путин менен "абдан жакшы байланыштары" бар экенин айтып, Россиянын президентин "көрүнүктүү саясий ишмер" деп мүнөздөдү.
Песков: "Биз Казакстан менен болгон эки тараптуу карым - катнаштарыбызга чоң маани беребиз. Бул келечекке багытталган, абдан кеңири стратегиялык өнөктөштүк карым - катнаштар",- деп кошумчалады.
Путин менен Токаевдин ортосундагы карым - катнаштын Украинадагы кырдаалды жөнгө салуу аракеттери менен эл аралык маселелерди талкуулоого мүмкүндүк берерин белгиледи.
Песков Путиндин Токаев менен өткөргөн жолугушууларда Украинадагы кырдаал боюнча үзгүлтүксүз маалымат берип турганын да кошумчалады.
