Түркиядагы кыргыздар Изник шаарында курман болгон Кыргыз жоокерлерин эскерүү үчүн чогулушту. Бул иш- чараны Кыргызстандын Стамбулдагы башкы консулдугу уюштурду. Иш-чарага Түрк Мамлекеттер Уюмунун (ТМУ) башкы катчысы, элчи Кубанычбек Өмүралиев, Кыргыз Республикасынын Түркиядагы атайын жана ыйгарым укуктуу элчиси Руслан Казакбаев, Бурса провинциясынын Изник районунун акими Ариф Караман, Изник шаарынын мэри Каган Мехмет Уста, КРнын Стамбулдагы башкы консулу Чынгыз Токтобеков, КРнын Анталиядагы башкы консулдугунун өкүлдөрү жана Түркиянын ар тарабынан келген кыргыз жарандары менен Изник шаарынын тургундары катышты.

Иш-чарада сөз сүйлөгөн Кубанычбек Өмүралиев Казакстандын Түркстан шаарында өткөн Түрк Мамлекеттер Уюмунун бейформал саммитинде түрк дүйнөсүндөгү жарандардын бири-биринин музейлерине бирдей баада кирүүсү жана түрк дүйнөсүндөгү өлкөлөрдүн жарандары ички паспорт (ID карт) менен саякат жасоосуна карата сунуш киргизилип, күн тартипке алынганын айтты.

Элчи Руслан Казакбаев Кыргызстандын эгемендигин биринчи тааныган өлкө Түркия болгонун айтып, бул жерде өз мамлекетиңерде жүргөндөй жүрөсүздөр. Ар жыл сайын май айында Түркиядагы кыргыздар Изник шаарындагы Кыргыздар күмбөзүндө жолугушуп, курмандык чалышат жана шейит аскерлерге Куран түшүрүшөт. Бул сапар да, ошондой куран окутуп келдик. Жаткан жерлери жайлуу болсун!-деди.

Эскерте кетсек, Осмон империясынын экинчи падышасы Орхан Газинин Изник шаарын ээлешинде кыргыз жоокерлеринин салымы өтө чоң болгон. Шаар толук алынгандан кийин ал атайын Кыргыздар үчүн күмбөз салдырганы айтылат.