Түркиянын президенти Режеп Таййип Эрдоган Түркия жаңы калыптанган дүйнөлүк тартиптин борбордук уюлдарынын бирине айланаарын айтты.
Бейшемби күнү Түркиянын Ишкерлер Конфедерациясынын 7-кезексиз Жалпы жыйынында сүйлөгөн сөзүндө Эрдоган: "Сириядагыдай эле биз аракеттерибиздин жемишин көрө турган жана тарых менен абийирдин туура тарабында туруунун сыйлыгын ала турган жаңы мезгилге кирип жатабыз" деди.
"Дүйнө акырындап биз айтып келген багытка жылып баратат. Глобалдык саясатка карата көптөгөн жылдардан берки сын-пикирлерибиздин негиздүүлүгү бүгүн айкын болууда", - деди.
Эрдоган Түркиянын жолу жана тагдыры жаркын экенин, жаңы эшиктер ачыларын, жаңы мүмкүнчүлүктөр пайда болорун жана күтүүлөрдөн тышкаркы мүмкүнчүлүктөр жараларын билдирди.
«Жетишкендиктерибиз дос-душман тарабынан айтыла турган, акырында улуу жана күчтүү Түркия пайда боло турган таптакыр башкача жолдо баратабыз,», - деп кошумчалады.
Ал ишкерлерге жана бизнесмендерге Түркиянын кризис, башаламандык жана экономикалык кыйынчылыктарга кабылышын көп жылдардан бери күтүп келген экономисттерди этибарга албоону кеңеш берди.
«Экономикалык киллерлер рынокко божомол катары коюп жаткан караңгы сценарийлерге ишенбейбиз», - деди.
Гренландия үчүн ортомчулук ролу
Ошол эле учурда АКШнын тышкы саясат боюнча адиси Гренландия темасында чыңалуу күчөп жаткан маалда Түркия АКШ менен Европанын ортосунда ортомчулук ролду ойной алат деп билдирди.
Брукингс институтунун тышкы саясат программасынын алдындагы Строб Талботт коопсуздук, стратегия жана технология борборунун адиси Филип Гордон шаршемби күнү Түркиянын позициясы ага трансатлантикалык мамилелер чыңалган учурда маанилүү роль берерин айтты.
