Пакистан шаршемби күнү таңга маал Индиянын аба соккуларынан кеминде 26 жайкын тургун набыт болгонун айтып, өзөктүк куралы бар эки коңшуну кеңири кагылышууга алып келиши мүмкүн экенин эскертти.
Жаңы Дели 22-апрелде Индия башкарган Кашмирдеги кандуу кол салуудан кийин «террордук лагерлерди» бутага алганын билдирди. Бирок Исламабад карапайым калк жашаган аймактар бомбаланганын жана бул кол салууларда 26дан ашуун адам каза таап, 46сы жарадар болгонун билдирди.
Пакистан дагы чек арадагы аба соккуларына жооп иретинде Индиянын беш согуштук учагын атып түшүргөнүн ырастады. Индиянын жергиликтүү бийлик өкүлдөрү үч согуштук учак Индия башкарган Кашмирде кыйраганын айтышты, бирок Дели бул боюнча расмий билдирүү жасай элек.
Тирешүү күчөгөндө Индия менен Пакистан талаштуу чек араны бойлото артиллериялык аткылоо менен бири-бирине кол салышты. Эки тарап тең жоготуулар тууралуу кабарлашса, Индия Пакистандын артиллериялык аткылоосунда Кашмирдин иш жүзүндө чек арасын бойлой үч карапайым тургун набыт болгонун билдирди.
Жаңы Дели Пакистан башкарган Кашмир жана Пенджаб провинцияларындагы тогуз жерге «террорчулардын лагерлерине так сокку урганын» айтып чыкты. Бул чабуулдар Пахалгамдагы кол салуу үчүн Пакистанды жооптуу деп көрсөткөндөн кийин болду, ал эми Пакистан чабуулга эч кандай тиешеси жок экенин айтып, Индиядан далил талап кылган.
Согуштук учактар кыйрады
Индиянын чек арадагы чабуулдарынан бир нече саат өткөндөн кийин жергиликтүү бийликтеги төрт булак Reuters агенттигине үч согуштук учак Индия башкарган Кашмирде кыйраганын айтышса, Пакистан армиясынын өкүлү беш индиялык согуштук учак атып түшүрүлгөнүн айтты. Индия кийинчерээк үч согуштук учак атып түшүрүлгөнүн ырастады.
«Пропорционалдуу»
Исламабад чабуулдардан сегиз жай тургун, анын ичинде бир бала каза болгонун кабарлады. Франс Пресс агенттигинин кабарчылары Пакистан башкарган Кашмир жана Пенжаб аймактарында бир нече катуу жардырууларды укканын кабарлашты. Пакистандын башкаруусундагы Кашмирдин борбору Музаффарабадда Индия кол салган мечитти аскердик бөлүктөр курчоого алды, ал эми кээ бир үйлөрдүн дубалдарында жарылуунун издери байкалды.
Андан көп өтпөй Индиянын аскерлери Пакистанды Кашмирдин де-факто чек арасы болгон Көзөмөл линиясын бойлото ок атуусун айыптады, Франс Пресс кабарчылары снаряддар түшкөн жерден жалын көтөрүлүп жатканын көрүшкөнүн билдирди . Индия армиясы: «Үч бейкүнөө жаран каза болду», - деп билдирүү жасап, алар «пропорционалдуу» жооп беришкенин кошумчалады.
«Негизсиз жана коркоктук чабуул»
Пакистандын премьер-министри Шахбаз Шариф Индиянын кол салышын «себепсиз» жана «коркоктук» деп сыпаттады жана «Бул коркок чабуул жазасыз калбайт» деди.
Дипломаттар лидерлерди согуштун босогосунан артка чегинүүгө мажбурлашты. Кытай Индиянын Пакистанга жасаган чабуулдарына кайгырып, тынчсыздануусун билдирип, эки тарапты сабырдуулукка чакырды. Башкача айтканда, «Дүйнө Индия менен Пакистандын ортосундагы аскердик чыр-чатакты көтөрө албайт». БУУнун баш катчысы Антониу Гутерриштин басма сөз катчысы Стефан Дюжаррик Гутеррештин «абдан сабырдуулукка» чакырганын кошумчалады.
АКШнын президенти Дональд Трамп Вашингтондо журналисттерге кагылышуулар «абдан тез арада бүтөт» деп үмүттөнөрүн билдирди. Кабарларга караганда, АКШнын мамлекеттик катчысы Марко Рубио кол салуулардан кийин Жаңы Делинин да, Исламабаддын да жогорку даражалуу коопсуздук кызматкерлери менен сүйлөшүүлөрдү өткөрдү.
Пакистандын Пенжаб провинциясындагы мектептер шаршемби күнү Индия жарандык коргонуу боюнча бир нече машыгууларды өткөрүүгө даярданып жаткандыктан жабылганын жергиликтүү бийлик өкүлдөрү ырасташты.
Кол салуулар Моди Индиянын чек арасы аркылуу агып жаткан суу токтотулат деп жарыялагандан бир нече сааттан кийин болду. Пакистан Индиядан анын аймагына агып жаткан дарыяларды бузуу «согуш актысы» болорун эскертти.
