Орусиянын президенти Владимир Путин жаңы деңиз стратегиясын бекитти. Бул стратегия Орусиянын дүйнөдөгү алдыңкы деңиз державаларынын бири катары ордун толук калыбына келтирүүгө багытталган. Бул тууралуу дүйшөмбү күнү жарыяланган маегинде Кремлдин жардамчысы Николай Патрушев билдирди.
Көпчүлүк коомдук рейтингдерге ылайык, Орусиянын деңиз флоту дүйнөдө Кытай менен АКШдан кийинки үчүнчү күчтүү флот болуп саналат. Бирок, Украинадагы согуш учурунда флот бир катар олуттуу жоготууларга дуушар болду.
Патрушев, мурдагы КГБ офицери жана Советтер Союзу учурунда Санкт-Петербургда Путин менен чогуу иштеген, жаңы деңиз стратегиясы "2050-жылга чейин Орусиянын деңиз флотун өнүктүрүү стратегиясы" деп аталганын жана аны Путин май айынын аягында бекиткенин айтты.
"Орусиянын дүйнөдөгү эң улуу деңиз державаларынын бири катары орду акырындык менен калыбына келүүдө," - деп Патрушев Аргументы и Факты гезитине берген маегинде билдирди.
Патрушев: “Мындай иштерди океандардагы кырдаалдын өнүгүү сценарийлерин, чакырыктар менен коркунучтардын эволюциясын жана албетте Орусиянын деңиз флотунун алдында турган максаттар менен милдеттерди аныктабастан жүргүзүү мүмкүн эмес," - деп кошумчалады.
Патрушев стратегиянын майда-чүйдөсүн ачыктаган жок. Бирок, Орусия коргонуу жана коопсуздук тармагына чыгымдарды ички дүң продукциянын пайызы боюнча Совет доорундагы деңгээлге чейин көбөйткөнү белгилүү.
АКШнын Коргоо министрлигинин 2021-жылдагы отчетуна ылайык, Кытай дүйнөдөгү эң чоң деңиз флотуна ээ жана анын жалпы согуштук күчү 2030-жылга чейин 460 кемеге жетет деп күтүлүүдө.
Ачык булактардагы маалыматтарга ылайык, Орусияда 79 суу астындагы кайык, анын ичинде 14 өзөктүк баллистикалык ракета ташуучу суу астындагы кайык жана 222 согуштук кеме бар. Анын негизги флоту Баренц деңизиндеги Североморск шаарында жайгашкан Түндүк флот болуп саналат.
