Жергиликтүү маалымат каражаттарынын ишемби күнкү кабарларына караганда, Түштүк Корея ушул аптанын башында Сары деңиздин үстүндө өткөрүлгөн машыгуу учурунда АКШ менен Кытайдын согуштук учактарынын ортосунда чыккан чыңалуудан улам, АКШнын Кореядагы күчтөрүнө (USFK) нааразычылык билдирди.

Сеулдагы Йонхап маалымат агенттигинин атын атабаган аскердик булактарга таянуу менен берген кабарына караганда, Коргоо министри Ан Гю Бэк шаршемби күнү окуя тууралуу отчет алгандан кийин дароо Бириккен күчтөрдүн командирлиги жана АКШнын Кореядагы күчтөрүнүн командири, генерал Ксавьер Брансонго телефон чалып, нааразычылыгын билдирди.

Түштүк Кореянын башкы штабынын төрагасы, генерал Цзинь Ён Сон генерал Брансон менен өткөргөн телефон аркылуу сүйлөшүүдө ушул сыяктуу нааразычылык билдиргени белгиленди.

Шаршемби күнү АКШнын аба күчтөрүнө таандык 10 даана F-16 согуштук учагы катышкан аба машыгуусу учурунда АКШ менен Кытай согуштук учактары Сары деңиздин үстүндө кыска убакытка бетме - бет келишти. Билдирилгенге караганда F-16 учактары Түштүк Корея менен Кытайдын абадан коргонуу идентификациялык зоналарынын (ADIZ) ортосундагы чекке чейин учкан.

Бул кадам Кытай армиясынын аймакка өзүнүн согуштук учактарын жөнөтүүсүнө себеп болгон; бирок эч кандай кагылышуу болгон эмес.

Түштүк Кореялык жетекчинин айтымында, АКШнын Индия-Тынч океан командирлигине караштуу биргелешкен командирлик болгон АКШ Корея күчтөрү, машыгуу операциясынан мурун планды Сеулдун аскердик жетекчилигине билдиришкен, бирок машыгуунун максаты сыяктуу деталдар боюнча жетиштүү маалымат беришкен эмес.

Түштүк Корея АКШнын эң эски жана эң жакын союздаштарынын бири жана Вашингтон менен Сеулдун ортосундагы өз ара коргонуу келишиминин алкагында Корей жарым аралында 28 500гө жакын америкалык аскер жайгашкан.