YPG террордук уюмунун лидери Сирия армиясы аймакта аскердик операцияларды баштоосу менен уюмдун Евфрат дарыясынын батышындагы аймактардан чегинерин билдирди.
Террордук уюмдун башчысы Ферхат Абди Шахин жасаган билдирүүсүндө, чегинүү 10-марттагы келишимдин шарттарына карата «ак ниеттүүлүктүн» белгиси катары жасалып жатканын белгилеп, куралдуу түзүмдөр ишемби күнү жергиликтүү убакыт боюнча эртең мененки саат 07:00дө Евфраттын чыгышын көздөй чегине баштаганын айтты.
Сирия армиясы 13-январда Евфраттын батышындагы аймактарды, Дейр-Хафир жана Мескенени террористтик оккупация астындагы аймактар катары мүнөздөп, аскердик аймак деп жарыялады.
Армия Дейр-Хафирдеги жайкын тургундарды убактылуу жана коопсуз эвакуациялоону жеңилдетүү үчүн бейшемби жана жума күндөрү М15 автожолунда гуманитардык коридор ачты.
Жума күнү жарыяланган билдирүүдө армия Дейр-Хафирдеги террористтердин чептери деп аныкталган аймактардын карталарын жарыялап, жайкын тургундарды бул аймактардан алыс болууга чакырды.
Армия жума күнү жергиликтүү убакыт боюнча кечки саат 10:00дө жарыяланган буталарга каршы операцияларды баштаганын жарыялады.
Сирия чегинүүнү ыраазычылык менен кабыл алды
Сириянын Коргоо министрлиги YPG террордук уюмунун Евфрат дарыясынын батышындагы байланыш тилкелеринен чыгуу чечимин ыраазычылык менен кабыл алды.
Министрлик дарыянын чыгышына бардык персоналды жана аскердик техниканы чыгарып кетүү процессинин аякташын кылдат көзөмөлдөй турганын билдирди.
Ошондой эле министрлик бул чегинүү аймакта коопсуздукту камсыз кылуу жана мамлекеттик эгемендүүлүктү калыбына келтирүү үчүн Сирия армиясынын бөлүктөрүн жайгаштыруу менен бир убакта жүргүзүлөрүн билдирди.
Жетекчилер бул процесс тургундардын үйлөрүнө жана айылдарына коопсуз жана тез кайтып келишине өбөлгө түзүп, мамлекеттик мекемелердин кайра жанданышына жол ачат.
