Түркиянын алдыңкы технологиялык иш-чарасы TEKNOFESTтин Башкаруу кеңешинин төрагасы Селчук Байрактар жогорку технология жана жасалма интеллекттин (AI) жаңы дүйнөнүн ачкычы экенине басым жасады. Байрактар, жасалма интеллект туура максат жана этикалык баалуулуктар менен айкалышканда адамзатка алда канча жакшыраак келечек тартуулай аларын айтты.
Лефкошадагы эски Эржан аэропортунда өткөн TEKNOFESTтин ачылыш аземинде сүйлөгөн сөзүндө Селчук Байрактар, жасалма интеллекттин саламаттык сактоодо жаңычылдыктарды, бирдей билим берүү жана жашоону жеңилдете турган сансыз мүмкүнчүлүктөрдү камсыз кыла аларын баса белгиледи.
Дүйнөнүн коркунучтуу караңгылыкка сүйрөлүп жатканын билдирген Байрактар: "Биздин көз алдыбызда адамзатка каршы чоң кылмыш, геноцид болуп жатат. Газада балдар бомбаланууда. Бул караңгылыкты чындык жарыгы гана жок кыла алат. Технология адилеттүүлүк жана боорукердикти жайылтуу үчүн колдонулган дүйнө түзүлүшү керек", - деди.
Түндүк Кипрдин абалына токтолгон Байрактар өлкөнүн бир гана тарыхый күрөштөрдүн эмес, чоң жетишкендиктердин да символу болушу керектигин айтты. Байрактар Түндүк Кипр Түрк Республикасынын Жер Ортолук деңизинин жүрөгүндө технология жана илимдин дүйнөлүк борбору болушу керектигин баса белгилеп, Түндүк Кипрге эс алуу үчүн гана эмес, илим, технология жана өндүрүш үчүн да баруу керектигин кошумчалады.
"Түндүк Кипрде жаңы идеялар жаралышы керек. Бул жерде илимий-изилдөө иштери өнүгүп, дүйнөгө таасир калтыра турган долбоорлор пайда болушу зарыл", - деди Байрактар.
"ТКТР тынчтык аралы, бул Жер Ортолук деңиздеги тынчтыктын, коопсуздуктун жана бир туугандыктын кепилдиги"
Түрк Технология Командасы (T3) Фонду менен Түркиянын Өнөр жай жана Технология министрлиги тарабынан уюштурулган TEKNOFEST 2018-жылдан бери жыл сайын өткөрүлүп келет. Бул иш-чарага ондогон мамлекеттик органдар, жеке сектордун өнөктөштөрү жана университеттер колдоо көрсөтөт.
Анадолу агенттиги фестивалдын дүйнөлүк байланыш өнөктөшү катары кызмат кылууну улантууда. Иш-чара жуп жылдары Түркиянын ар кайсы шаарларында, так жылдары Стамбулда өткөрүлөт. Түндүк Кипр Азербайжандан кийин TEKNOFESTти өткөргөн экинчи өлкө болду.
2024-жылы Түркиянын түштүгүндөгү Адана шаарында өткөн иш-чарага болжол менен 1,1 миллион конок катышкан.
Инновация аралы
Иш-чарада сөз сүйлөгөн Түркиянын өнөр жай жана технология министри Мехмет Фатих Кажыр бардык тараптар биргелешип иш алып барса, Түндүк Кипр Түрк Республикасы инновация аралына айланышы мүмкүн экенин айтты.
Министр Кажыр: "100 миңден ашуун университет студенти жана теңдешсиз кооздуктары менен бул жерлер, дүйнөгө кызмат кыла турган IT жана технология демилгелеринин дареги боло алат. Бул TEKNOFESTте уюштурган 6 сынакка катышкан 47 миң жаштын толкундануусу жаркын келечектин жарчысы. Биздин тилегибиз бул толкундануунун Tүндүк Кипрде уланышын каалайбыз" деди.
Түркиянын Коргоо өнөр жайы агенттигинин башчысы Халук Гөргүн болсо: "Биз өзгөчө коргонуу өнөр жайында тышкы көз карандылыктын азабын жакшы билген өлкөбүз. TEKNOFEST өлкөбүздөгү эң чоң изилдөө платформасына айланды", - деди.
