Президент Дональд Трамп Кока-Коланын АКШда өндүрүлгөн суусундуктарында фруктозасы жогору жүгөрү сиропунун ордуна камыш кантын колдоноорун билдирди.

Трамп Truth Social платформасында “Coca-Cola менен АКШда өндүрүлгөн суусундуктарында чыныгы камыш кантын колдонуу темасында сүйлөштүм жана алар муну кабыл алышты. Бул албетте жакшыраак!” – деп жазды.

Президент мындай кийлигишүүгө эмне түрткү болгонун түшүндүргөн жок. Бирок бул кадам анын сүйүктүү Diet Coke суусундугуна таасирин тийгизбейт.

Coca-Cola ингредиенттердин өзгөрүүсүн ырастаган жок, бирок бир билдирүүсүндө: “Президент Трамптын биздин белгилүү Coca-Cola брендине болгон кызыгуусун баалайбыз. Coca-Cola продуктуларынын жаңы инновациялык сунуштары тууралуу жакында көбүрөөк маалымат беребиз”,-деди.

Трамптын сүйүктүү суусундугу Diet Coke аспартам менен таттуу кылынат, бул зат жакында Дүйнөлүк саламаттыкты сактоо уюмунун рак изилдөө бөлүмү тарабынан “ыктымалдуу канцероген” деп классификацияланган.

Ингредиенттердин өзгөрүүсү АКШнын орто батыш аймагында саясий чыңалууну жаратышы мүмкүн, анткени бул аймакта жүгөрү негизги өсүмдүк болуп саналат жана Трамптын бул жерде күчтүү колдоосу бар.